Rúm tuttugu þúsund nýttu frádráttarúrræði

Fjöldi skattframteljanda er 317.567 í ár og fjölgar um 5.056 á milli ára. Skattskyldar tekjur framteljenda nema 2.005 milljörðum króna og skila samtals 284 milljörðum króna í tekju- og fjármagnstekjuskatt til ríkissjóðs og og 275 milljarða króna í útsvar til sveitarfélaga. 

Um 234 þúsund einstaklingar fá álagðan tekjuskatt og fækkar þeim um tæplega 1.600 á milli ára. Þá fá 306 þúsund einstaklingar álagt útsvar og framteljendur sem hafa engar tekjur og falla undir tekjuskatts- og útsvarsstofn eru tæplega tólf þúsund. 

Tekjuskatts- og útsvarsstofn landsmanna árið 2022 vegna tekna ársins 2021 nemur 1.824 milljörðum króna og hækkar um 7,2% frá fyrra ári. Stofninn telur öll laun og ígildi launa, hlunnindi, lífeyri frá Tryggingastofnun og lífeyrissjóðum, atvinnuleysisbætur, styrki og hvers kyns aðrar greiðslur að teknu tilliti til frádráttar. 

Fram kemur í tilkynningu frá fjármála- og efnahagsráðuneytinu að af einstökum tekjuliðum hafi laun og hlunnindi hækkað um 9,3% greiðslur úr lífeyrissjóðum og greiðslur frá Tryggingastofnun hækkuðu um 5,3%. Aðrar skattskyldar tekjur og styrkir hækkuðu um 6,2%. Á móti drógust atvinnuleysisbætur saman um 26% og námu 48 milljörðum króna. 

Heildarfrádráttur frá tekjuskatts- og útsvarsstofninum var 118 milljarðar króna og eykst hann um 10% milli ára. Í fyrsta sinn var heimilt að draga frá tekjuskatts- og útsvarsstofni gjafir og framlög til skráðra almannaheillafélaga. Samtals nýttu 20.473 einstaklingar þetta úrræði og drógu 416 milljónir króna frá tekjuskatts- og útsvarsstofni sínum. Þá er frádráttur vegna kaupa á hlutabréfum samtals 348 milljónir sem er 227 milljón króna hækkun frá fyrra ári.

• Blogga um frétt