Play tapar tveimur milljörðum en stefnir í plús

Tap flugfélagsins Play á öðrum ársfjórðungi þessa árs nam 14,3 milljónum dala, eða sem nemur um 2 milljörðum íslenskra króna. Samanlagt tap félagsins það sem af er ári nemur 25,6 milljónum dala, eða um 3,5 milljörðum.

Þetta má sjá í nýjum árshlutareikningi sem félagið sendi frá sér í dag. Forstjóri félagsins segir að stefnt sé að því að rekstrarafkoma síðari hluta ársins verði jákvæð og að 200 starfsmenn verði ráðnir fyrir næsta vor.

Play flutti á öðrum ársfjórðungi samtals 181 þúsund farþega og gerir nú ráð fyrir að heildarfjöldi farþega á árinu verði um 800 þúsund. Þá spáir félagið því að velta ársins verði um 20 milljarðar.

Afkoman viðbúin

Rekstrartap félagsins fyrir skatta, fjármagnsliði og afskriftir nam 14,2 milljónum dala á fyrri hluta ársins, eða tæplega tveimur milljörðum. Í tilkynningu vegna uppgjörsins kemur fram að afkoman hafi verið viðbúin þar sem félagið hafi enn ekki náð tilætlaðri stærðarhagkvæmni.

Play átti í lok júní 39,5 milljónir Bandaríkjadala í handbært fé og að eiginfjárhlutfall félagsins hafi verið 13,4%.

Fram kemur að félagið hafi í júlí loks komist í fullan rekstur eftir að hafa skalað starfsemina upp í aðdraganda sumaráætlunar og að allt tengiflugskerfið sé nú komið af stað og að sex flugvélar séu í notkun.

Segir rekstur Play nú stöðugan

„Eftir flugtak og klifur síðustu mánaða er nú fyrst óhætt að segja að PLAY sé komið í farflugshæð. Í flugbransanum þýðir það að við séum orðin stöðug. Annar ársfjórðungur var síðasti hluti klifursins og nú á þriðja ársfjórðungi er viðskiptamódel félagsins loks orðið að veruleika,“ er haft eftir Birgi Jónssyni, forstjóra félagsins.

Segir Birgir jafnframt að félagið sjái fram á hagfelldar ytri aðstæður þar sem eldsneytisverð fari ört lækkandi.

„Við sjáum fram á bjarta tíma, bókunarstaðan er sterk og til stendur að skila jákvæðri rekstrarafkomu á síðari helmingi ársins. Fólk er augljóslega hætt að setja COVID-19 fyrir sig þegar það tekur ákvörðun um að ferðast sem sést til dæmis á því að mun færri kaupa sér forfallavernd og þá er fólk farið að bóka flug lengra fram í tímann.“

Ætla að bæta við 200 starfsmönnum

Birgir segir stór verkefni framundan, meðal annars að taka á móti fjórum nýjum flugvélum sem bætast í flotann næsta vor og ráða inn áhafnir á þær vélar. Segir hann að 200 manns muni bætast við þá 300 sem þegar starfi hjá félaginu við það.

• Blogga um frétt