Byggja upp jarðefnagarð í Álfsnesi

Þorsteinn Víglundsson, framkvæmdastjóri Hornsteins ehf. og Jón Viggó Gunnarsson, framkvæmdastjóri SORPU bs., hafa undirritað viljayfirlýsingu um samstarf um uppbyggingu á jarðefnagarði á athafnasvæði Björgunar ehf. í Álfsnesvík í Álfsnesi.

Þar verður móttaka á jarðvegi, steinefnum og óvirkum úrgangi frá byggingariðnaði. Með þessu verður mögulegt að hafa til taks flokkaðan jarðveg til endurnýtingar í byggingarstarfsemi, gatnagerð og aðra landfyllingu.

„Gríðarlegt magn margvíslegs úrgangs fylgir byggingarframkvæmdum og mikil áskorun að gera betur, endurnýta efni og draga úr sóun,“ segir í tilkynningu.

„Meira en 530 þúsund tonn falla til árlega af byggingarúrgangi á Íslandi og hefur lítið af því efni verið endurnýtt. Með þessu yrði stórt skref stigið í endurnýtingu þessara efna og innleiðingu hringrásarhagkerfis á Íslandi.“

Fram kemur að 1. janúar næstkomandi taka gildi nýjar reglur um sérstaka söfnun byggingarúrgangs. Meðal annars verður skylt að flokka rekstrarúrgang og byggingar- og niðurrifsúrgang sérstaklega og ber sveitarfélögum að tryggja aðstöðu til að taka við þessum úrgangi flokkuðum.

„SORPA vill með þessu stuðla að því að þessum lögum sé fylgt og styðja við uppbyggingu endurvinnsluiðnaðar og innleiðingu hringrásarhagkerfis á Íslandi,“ segir í tilkynningunni.

• Blogga um frétt