Viðskipti | mbl | 24.8.2022 | 11:24

Heimilin gengið hraðar á sparnað en spáð var

Þórarinn G. Pétursson, aðalhagfræðingur Seðlabankans, og Ásgeir Jónsson seðlabankanstjóri á kynningarfundi peningastefnunefndar í morgun. mbl.is/Hákon

Þrátt fyrir ýmsar hremmingar á alþjóðaefnahagssviðinu virðist þjóðarbúskapurinn innanlands standa óveðrið nokkuð vel af sér. Seðlabankinn hefur uppfært hagvaxtarspá sína frá því í maí og gerir nú ráð fyrir 5,9% hagvexti á árinu í stað 4,6%. Þetta helgast meðal annars af hraðari bata í ferðaþjónustu og því að mun meiri vöxtur hefur verið í einkaneyslu en áður var spáð, en á sama tíma hefur almenningur gengið hraðar á þann sparnað sem safnaðist upp í faraldrinum.

Frétt af mbl.is

Stýrivextir hækkaðir um 0,75 prósentur

Þetta var meðal þess sem kom fram í máli Þórarins G. Péturssonar, aðalhagfræðings Seðlabankans, á kynningarfundi peningastefnunefndar, en í morgun var tilkynnt um 0,75 prósenta stýrivaxtahækkun.

Mögulegt ofmat í útflutningstölum

Landsframleiðsla á fyrsta ársfjórðungi þessa árs mældist 1,1% hærri en á síðasta ársfjórðungi síðasta árs samkvæmt bráðabirgðatölum Hagstofunnar. Þar með er árshækkunin 8,6%, en það er talsvert meiri aukning en spáð var. Þórarinn sagði reyndar nýjar upplýsingar benda til að um ofmat á útflutningi á sjávarútvegsvörum sé að ræða í bráðabirgðatölunum og að líklegra sé að árshækkunin sé því um 7,5%. Það sé engu að síður hærra en áður hafði verið gert ráð fyrir.

Frétt af mbl.is

Gætum verið að nálgast snúningspunktinn

Einkaneysla aukist mikið á kostnað sparnaðar

Benti Þórarinn á að vísbendingar væru um að einkaneysla hefði verið áfram mjög kröftug á öðrum ársfjórðungi þessa árs og að hún hafi aukist um 14% samanborið við sama ársfjórðung í fyrra. Það væri töluvert meiri vöxtur en spáð var í maí og að útlit væri fyrir að heimilin hafi dregið hraðar úr sparnaði eða gengið á umframsparnað sem safnaðist upp í faraldrinum en bankinn hafði áður gert ráð fyrir.

Er nú gert ráð fyrir að vöxtur einkaneyslu verði 7,2% yfir allt árið, en í maí spáði bankinn 3,1% vexti. Hins vegar er gert ráð fyrir að hægjast muni á vextinum á seinni hluta ársins meðal annars vegna aukinnar verðbólgu og þrengingar á fjárhagslegum skilyrðum. Þá vísaði Þórarinn til könnunar sem sýndi að heimilin væru nú svartsýnni um efnahagshorfur en þau voru fyrr á árinu.

Spá nú 300 þúsund fleiri ferðamönnum

Fjöldi ferðamanna til landsins hefur aukist nokkuð hraðar en bankinn spáði fyrr á árinu og í nýuppfærðri spá sinni gerir bankinn ráð fyrir samtals 1,7 milljónum farþegum á árinu í stað 1,4 milljónum. Þá benti hann á að þrátt fyrir erfiðari efnahagsstöðu í okkar helstu viðskiptalöndum þá sýndu leitarniðurstöður á Google að ferðamenn væru enn að leita mikið að ferðalögum til landsins og það væri jákvætt merki.