Viðskipti | mbl | 24.8.2022 | 11:45

Mikil fjölgun starfa og vísbendingar um ofhitnun

Þórarinn G. Pétursson, aðalhagfræðingur Seðlabanka Íslands. mbl.is/Hákon

Hvert metið á fætur öðru hefur verið slegið á vinnumarkaði. Störfum á öðrum ársfjórðungi fjölgaði um 8,3% frá sama tíma í fyrra og vinnuvikan er farin að lengjast á ný eftir að hún styttist í faraldrinum. Hefur heildarvinnustundum fjölgað um 9,1% og er það mesta ársfjölgun frá upphafi mælinga. Þá fjölgar lausum störfum hratt og atvinnuleysi hefur lækkað mikið.

Þetta kom fram í máli Þórarins G. Péturssonar, aðalhagfræðings Seðlabankans, á kynningarfundi peningastefnunefndar í morgun, en í morgun varð ljóst að bankinn myndi hækka stýrivexti sína um 0,75 prósentur.

Þórarinn benti á að atvinnuþátttaka hefði aukist mikið að undanförnu og væri nú komin upp í 80% sem væri sama tala og fyrir farsótt. Þá hefði atvinnuleysi minnkað hratt og væri nú undir 4%.

Sagði Þórarinn að verulegur kraftur væru í vinnumarkaðinum og vísbendingar væru um að hann væri að ofhitna.

12 þúsund laus störf

Í könnunum hjá fyrirtækjum kæmi einnig í ljós að mikill skortur væru á vinnuafli, en lausum störfum hefur fjölgað hratt og mælast nú um 12 þúsund og hefur fjölgað um 5 þúsund milli ársfjórðunga. Vísaði Þórarinn til þess að 54% fyrirtækja segðu að það skorti starfsfólk og það væri næst hæsta gildi frá upphafi mælinga. Þá teldi 61% fyrirtækja að þau væru að starfa á fullum afköstum og að þau ættu erfitt með að mæta óvæntri eftirspurn.

Þessari stöðu hefur verið mætt með innflutningi á vinnuafli, en aðfluttir erlendir ríkisborgarar umfram brottflutta voru 3.510 á öðrum ársfjórðungi og er þetta mesti fjöldi sem hefur flutt til landsins á einum fjórðungi frá því að Hagstofan byrjaði að birta þær tölur.

Gerir Seðlabankinn ráð fyrir því að atvinnuleysi verði um 3,8% að meðaltali í ár en þokist upp í liðlega 4% þegar líður á spátímann sem er það atvinnuleysi sem talið er samræmast verðstöðugleika.