Spá áframhaldandi hjöðnun verðbólgu

Ársverðbólgan fór hæst í 9,9% í júlí og lækkaði svo í 9,7% í ágúst. Samkvæmt spá hagfræðideildarinnar hækkar almennt verðlag milli ágúst og september um 0,34%. Ef sú spá gengur eftir mun ársverðbólgan mælast 9,6% í september. Ástæða þess að ársverðbólgan gæti lækkað, þrátt fyrir hærra verðlag, er að hækkunin á sama tíma fyrir ári var umfram þau 0,34% sem hagfræðideildin spáir.

Þá segir hagfræðideildin líklegt að verðbólgan haldi áfram að hjaðna smám saman á næstunni og að hún verði komin niður í 8,8% í desember.

Sumarútsölur teygt sig lengra

Í greiningu deildarinnar segir að í síðasta mánuði hafi ekki komið á óvart að flugfargjöld hafi lækkað í ágúst. Lækkunin var hins vegar aðeins meiri en gert hafði verið ráð fyrir. Þá hafi föt og skór hækkað minna en búist var við. Líkleg skýring á því er að sumarútsölur hafi teygt sig lengra inn í ágúst en reiknað var með. Gerir hagfræðideildin ráð fyrir að sá liður hækki nú milli mánaða.

Samkvæmt spánni er það hins vegar hækkun á mat og drykkjarvöru sem mun drífa áfram hækkun verðlags í september. Spáir deildin því að þar muni mælast 1,2% hækkun sem veldur 0,18% hækkun á vísitölu neysluverðs.

Áfram er spáð lægri flugfargjöldum. Talið er að lækkunin verði 6,59% og muni hafa 0,14% áhrif til lækkunar á vísitöluna. Húsnæði án húsaleigu er talið hækka um 0,28% og hækka vísitöluna um 0,03% og reiknuð húsaleiga muni hækka um 0,55% sem hækki vísitöluna um 0,11%. Telur hagfræðideildin að miklar verðhækkanir á fasteignamarkaði séu að baki og að við taki mun hóflegri hækkanir. Spáir hún því að vísitala íbúðaverðs hækki um 0,6% á næstu mánuðum. Það eru mun minni hækkanir en verið hefur.

• Blogga um frétt