Yngvi nýr forstjóri Sýnar

Yngvi Halldórsson hefur verið ráðinn sem nýr forstjóri Sýnar, en hann hefur frá árinu 2019 gegnt stöðu framkvæmdastjóra rekstrarsviðs fyrirtækisins. Þetta kemur fram í tilkynningu frá félaginu til Kauphallarinnar.

Yngvi er með B.S. gráðu í viðskiptafræði frá Háskóla Íslands og sat í stjórn félagsins árin 2014-2019. Áður starfaði Yngvi meðal annars hjá Össuri hf. um tíu ára skeið.

Í tilkynningunni er haft eftir Petreu I. Guðmundsdóttur, stjórnarformanni Sýnar, að við núverandi aðstæður sé mikilvægt að tryggja festu í rekstri félagsins. „Yngvi þekkir afar vel til félagsins og því mikill fengur að fá hann til að leiða daglegan rekstur þess,“ er haft eftir henni.

Í júlí var greint frá því að Heiðar Guðjónsson hefði selt 12,72% hlut sinn í félaginu og að hann myndi láta af störfum sem forstjóri. Greindi hann frá því að hann hefði orðið fyrir heilsubresti fyrr á árinu og verið ráðlagt í kjölfarið að minnka við sig vinnu. Hann starfaði þó tímabundið áfram sem forstjóri þar til ráðning nýs forstjóra var kláruð.

• Blogga um frétt