Play byrjar að fljúga til Porto

Flugfélagið Play hefur hafið sölu á áætlunarferðum til borgarinnar Porto í Portúgal.

Fyrst verður flogið á skírdag á næsta ári, eða fimmtudaginn 6. apríl.

Flogið verður tvisvar í viku fram í lok október, að því er fram kemur í tilkynningu frá félaginu.

Fyrsta skiptið

Porto er annar áfangastaður Play í Portúgal, en flugfélagið var með áætlunarferðir til höfuðborgarinnar Lissabon í ár og verður framhald á þeim ferðum á næsta ári.

Segir í tilkynningunni að þetta sé í fyrsta sinn sem flugfélag býður upp á beint áætlunarflug á milli Porto og Íslands.

„Porto er afar vinsæll áfangastaður fyrir ferðamenn en borgin hefur í tvígang verið valin besti evrópski áfangastaðurinn af samtökunum European Best Destinations, árin 2014 og 2017,“ segir þar.

Sjö áfangastaðir á Spáni

Haft er eftir forstjóranum, Birgi Jónssyni, að flugfélagið hafi boðað að það vilji verða leiðandi í ferðum á milli Íslands og Íberíuskagans. Það sé sýnt í verki með þessu flugi. 

„Fyrir erum við með Lissabon, sem var einn af vinsælustu áfangastöðum Play í ár, og þar að auki verðum við með sjö áfangastaði á Spáni, þar af fjóra á Spáni allt árið um kring. Nú eiga Íslendingar meiri möguleika á að komast í sólina á hagkvæman hátt og sömuleiðis er áhugi Portúgala og Spánverja mikill á Íslandi enda hafa þeir tekið afar vel í þjónustu Play.“

• Blogga um frétt