Ólafur Þór nýr framkvæmdastjóri hjá Play

Ólafur Þór Jóhannesson hefur verið ráðinn framkvæmdastjóri fjármálasviðs flugfélagsins Play. Tekur hann við af Þóru Eggertsdóttur, en í síðustu viku var greint frá því að hún hefði sagt starfi sínu lausu.

Frétt af mbl.is

Þóra segir skilið við Play

Ólafur Þór gegndi starfi forstjóra, aðstoðarforstjóra og framkvæmdastjóra fjármálasviðs Skeljungs hf. á árunum 2019 til 2022. Áður var hann framkvæmdastjóri fjármálasviðs og staðgengill forstjóra Basko ehf., eða á árunum 2012 til 2018. Þar áður var hann framkvæmdastjóri Miðengis ehf. frá árinu 2010 til 2012, en það var eignarhaldsfélag í eigu Íslandsbanka. Á árunum 2006 til 2010 var Ólafur framkvæmdastjóri fjármálasviðs Teymis hf.

Ólafur Þór sinnti jafnframt kennslu við viðskiptadeild Háskólans í Reykjavík. Hann er viðskiptafræðingur frá Háskóla Íslands og hlaut löggildingu sem endurskoðandi árið 2000. Hann lagði þau réttindi síðar inn þegar hann fór að starfa sem framkvæmdastjóri Teymis.

Uppfært: Í upphaflegri frétt var haft upp úr tilkynningu Play að Ólafur væri löggiltur endurskoðandi. Hið rétta er að hann lagði inn réttindi sín árið 2006 og hefur fréttin verið uppfærð í samræmi við það.

• Blogga um frétt