Húsasmiðjan byggir upp græna innviði og kaupir rafmagnsvörubíl

Húsasmiðjan hefur nú fest kaup á nýrri rafknúinni Volvo vöruflutningabifreið frá Brimborg sem ganga mun fyrir rafmagni og er gert ráð fyrir að bifreiðin verði komin í notkun snemma á næsta ári.

Hún verður með fyrstu rafmagnsvörubílum landsins. Það má gera ráð fyrir að þessi vöruflutningabifreið keyri um 2.000 km á mánuði að jafnaði og með því er komið í veg fyrir losun gróðurhúsalofttegunda upp á 1,3 tonn koltvísýringsígilda (CO₂e) eða rúmlega 15 tonn á ári, að því er Húsasmiðjan segir í tilkynningu. 

Þetta er liður í þeim markmiðum fyrirtækisins um að draga úr losun gróðurhúsalofttegunda í allri starfsemi fyrirtækisins. Hluti af þeim markmiðum er að að skipta út jarðeldsneyti í bílaflota fyrirtækisins í umhverfisvæna orkugjafa, segir enn fremur.

Emilía Borgþórsdóttir, verkefnisstjóri umhverfis- og samfélagsmála hjá Húsasmiðjunni, segir stöðugt unnið að því að hlutfall grænna vara hjá fyrirtækinu aukist enda sjái fyrirtækið vaxandi eftirspurn eftir þeim hjá viðskiptavinum. „Við trúum því að séum að stíga stór og leiðandi skref í byggingargeiranum með orkuskiptum og auknum áherslum á umhverfismál.“ Ljósmynd/Aðsend

Þá kemur fram, að með nýju timbursölunni við Kjalarvog hafi fyrirtækið náð að minnka heildar kolefnisfótspor timburs sem er afhent á byggingarstaði á höfuðborgarsvæðinu enn frekar þar sem timbrinu sé ekið beint úr skipi við uppskipunarhöfn í vöruhús og timbursölu með rafmagnslyfturum, þaðan sem timbrið fer svo í flestum tilvikum beint til viðskiptavina en ekki á millilagera.

„Húsasmiðjan stefnir að því að megnið af flutningum á timbri innanlands verði með flutningabílum sem ganga fyrir rafmagni.  Allt timbur sem selt er í Húsasmiðjunni er FSC og PEFC vottað sem þýðir að það kemur úr sjálfbærum skógum þar sem vist- og lífkerfi skógarins er gætt. Með þessu móti verður kolefnisfótspor timburs frá Húsasmiðjunni með því lægsta sem þekkist hér á landi,“ segir í tilkynningunni. 

• Blogga um frétt