Viðskipti | mbl | 25.10.2022 | 13:26 | Uppfært 13:52

Eitt land í Evrópu með minni verðbólgu en Ísland

Verðhækkanir á mat og drykk hafa verið meiri víðast hvar annars staðar í heimsálfunni. Ljósmynd/Guðmundur Rúnar

Verðbólga er töluvert minni hér á landi en annars staðar í heimsálfunni og hefur hún einungis mælst lægri í einu Evrópulandi síðasta mánuð. Verðhækkanir á mat og drykk hafa verið meiri víðast hvar annars staðar og sömu sögu má segja af orkukostnaði. Þá er verðbólgan á Íslandi byrjuð að hjaðna, sem er öfugt við þróunina í flestum öðrum löndum Evrópu. Þetta kemur fram í tilkynningu frá hagfræðideild Landsbankans.

„Síðustu áratugi hefur verðbólga hér á landi jafnan verið hærri og stundum mun hærri en í þeim löndum sem við viljum bera okkur saman við. Í dag er þessu öfugt farið og er verðbólga hér á landi nú minni en í langflestum samanburðarlöndum,“ segir í tilkynningunni.

6% verðbólga sé miðað við SVN

Verðbólga á Íslandi, mæld með samræmdri vísitölu neysluverðs (SVN) í Evrópu var 6% í september en verðbólga á mælikvarða neysluverðsvísitölunnar var á sama tíma 9,3%.

Munurinn á verðbólgutölunum liggur fyrst og fremst í því að SVN undanskilur fasteignaverðsþróun í verðmælingunni. Fasteignaverðsþróun hefur verið megindrifkraftur verðbólgu hér á landi.

Sé tekið mið af mælikvarða SVN var aðeins eitt land í Evrópu með minni verðbólgu en Ísland, Sviss, en þar var verðbólga 3,2%.

Staðan geti versnað

„Ekki nóg með að verðbólga sé lægri hér á landi heldur er hún einnig byrjuð að hjaðna. Það að verðbólgan sé byrjuð að hjaðna heyrir til undantekninga sé horft til ofangreindra landa en í flestum þessara landa var verðbólga að ná nýju hámarki nú í september. Það að verðbólga sé byrjuð að hjaðna er skýr vísbending þess að hámarki hafi verið náð og ólíklegt að verðbólga nái nýju hámarki á næstunni.“

Þá segir einnig í tilkynningunni að staðan kunni að versna í Evrópu áður en hún batni. Nýjustu gögn bendi til þess að verðbólga færist enn í aukana:

„Þetta á við um öll Norðurlöndin, evrusvæðið og lönd Evrópusambandsins. Ísland er þó ekki eina landið þar sem verðbólga hafði þegar náð hámarki fyrir september heldur á það einnig við um Kýpur, Frakkland, Írland, Lúxemborg og Spán.“