Vilja að borgarráð fjalli um starfsemi Ljósleiðarans
Setja bókamerki
Fulltrúar Sjálfstæðisflokksins í stjórn Orkuveitu Reykjavíkur (OR), þeir Kjartan Magnússon og Eyþór Arnalds, lögðu til á stjórnarfundi OR í gær að ákvörðun um afléttingu fyrirvara á lánasamningi OR, sem snúa að fjármögnun Ljósleiðarans, verði vísað til borgarráðs. Stjórnarfundi OR var frestað í gær og verður haldið áfram í dag.
Eins og ViðskiptaMogginn hefur fjallað um þarf að létta fyrirvörum á lánasamningi OR við Evrópska fjárfestingabankann til að rýmka fyrir frekari skuldsetningu Ljósleiðarans – sem á morgun, fimmtudag, mun kaupa grunnnet Sýnar fyrir um þrjá milljarða króna. Ekki fæst uppgefið hvernig þau kaup verða fjármögnuð en heimildir ViðskiptaMoggans herma að um sé að ræða dýrt skammtímalán.
Kjartan segir í samtali við ViðskiptaMoggann að ekki liggi fyrir hvernig langtímafjármögnun Ljósleiðarans verði háttað og enn sé með öllu óljóst hvort heimilt verði að auka hlutafé félagsins. Því hafi hann talið rétt að borgarráð fjallaði um málið, enda væri ljóst að Reykjavíkurborg bæri að lokum ábyrgð á skuldum OR og félaga innan samstæðunnar.
„Sú ákvörðun Ljósleiðarans að útvíkka starfsemi félagsins út um allt land, í stað þess að starfa á suðvesturhorni landsins í samræmi við eigendastefnu Orkuveitunnar, vekur líka upp margar spurningar. Það er rétt að borgarráð fjalli um það með málefnalegum hætti,“ segir Kjartan.
ViðskiptaMogginn hefur greint frá því að sérstakur rýnihópur borgarráðs hafi verið skipaður til að fjalla um fyrirhugaða hlutafjáraukningu Ljósleiðarans, en stefnt er að því að hlutafjáraukningin fari fram með þátttöku utanaðkomandi aðila. Rýnihópurinn hefur ekki lokið störfum og því liggur ekki fyrir hvort, hvenær eða hvernig hlutafjáraukningin fer fram.
ViðskiptaMogginn ítrekaði í gær spurningar til Brynhildar Davíðsdóttur, prófessors við Háskóla Íslands og stjórnarformanns OR, sem aftur neitaði að tjá sig um málið.
„Má segja að þetta gos hafi þjófstartað“
Yfir 300 stæði fóru undir hraun
Börn hafi engan rétt á leikskólakennslu
Drónamyndskeið frá hápunkti gossins í nótt
Hraunið náð Njarðvíkuræð: Fylgjast með raflínu
Fullvissa ferðamenn um að hér sé öruggt
Hótar Bretum og Bandaríkjamönnum