Dæmt til að borga 217 milljóna lán
Setja bókamerki
Eignarhaldsfélagið Kastalabrekka ehf. hefur verið dæmt til að greiða samtals 1.407.813 evrur til Arion banka vegna láns sem félagið tók til að kaupa hlutabréf í Sameinuðu sílikoni hf., fyrirtæki sem rak kísilverið United silicion í Helguvík. Þetta kemur fram í dómi Héraðsdóms Reykjavíkur sem birtur var í dag.
Kísilverið var starfrækt frá nóvember 2016 til september 2017, en þá var því lokað eftir að eldur hafði ítrekað komið upp í verksmiðjunni, framleiðslustopp hafði átt sér stað og þá hafði reyk frá verksmiðjunni lagt yfir Reykjanesbæ sem íbúar kvörtuðu hástöfum yfir.
Í september 2017 tók Arion banki, sem hafði verið stærsti lánveitandi fyrirtækisins, svo yfir 98,13% af hlutafé Sameinaðs sílikons hf., en þau 1,87% sem stóðu út af voru í eigu Kastalabrekku. Eigandi Kastalabrekku er lögmannsstofan Veritas lögmenn og er skráður forráðamaður þess Friðbjörn Eiríkur Garðarsson, hálfbróðir Magnúsar Garðarssonar, stofnanda og fyrrverandi stjórnanda United silicon. Í umfjöllun Stundarinnar frá árinu 2017 var greint frá því að ítalskur barón að nafni Felix Von Longo-Liebenstein væri eigandi Kastalabrekku í gegnum lögmannsstofuna.
Samkvæmt dómi héraðsdóms var lánið, upp á 1,1 milljón evrur, veitt 30. nóvember 2016, stuttu eftir að kísilverið hóf starfsemi. Var það kúlulán með einum gjalddaga í lok nóvember 2021. Þegar lánið gjaldféll hóf bankinn að reyna að innheimta það og fór svo með það fyrir dóm. Samkvæmt kröfu bankans stóð lánið í 1.407.813 evrum með áföllnum vöxtum, eða sem samsvarar um 217 milljónum íslenskra króna.
Lögmaður Kastalabrekku fór fram á að málinu yrði vísað frá þar sem það væri vanreifað og óskýrt. Dómari féllst hins vegar ekki á það og þar sem lögmaðurinn varðist ekki efnislega var í málinu farið að kröfum Arion banka. Hafnað er skilyrði sem lögmaður Kastalabrekku setti í greinargerð sína um að fá frest til að leggja fram nýja greinargerð um efnisvarnir verði ekki fallist á frávísunina.
Ók á hóp fólks á jólamarkaði: Einn látinn
„Mér finnst gamla Samfylkingin komin aftur“
Lát hjóna í Neskaupstað: Ákæra gefin út
„Óviðunandi eftirlit með börnum“
Nágrannaþjóðir upplýstar en við vöðum í blindni
Ný ríkisstjórn kynnt á morgun
Beint: Ný ríkisstjórn á Bessastöðum
