Entravision hefur starfsemi á Íslandi

Fyrirtækið Entravision hefur hafið starfsemi á íslenskum markaði sem vottaður sölu- og þjónustuaðili fyrir Meta, eiganda samfélagsmiðlanna Facebook, Instagram og Whatsapp.

Entravision, sem starfar á sviði auglýsinga, fjölmiðla og tækni, mun veita íslenskum auglýsendum stuðning, þjálfun og greiðsluþjónustu fyrir auglýsingar Meta í gegnum íslenskan lögaðila. Þar á meðal býður það upp á greiðslufrest.

„Við höfum unnið með Meta í langan tíma og erum spennt að hefja starfsemi með þeim á íslenskum markaði,” segir Juan Saldivar, yfirmaður hjá Entravision, í tilkynningu.

„Nú þegar Ísland bætist í hópinn verðum við orðin fulltrúar Meta í 14 löndum. Þessi viðbót gerir okkur kleift að styðja enn frekar við vaxandi stafræna markaði um allan heim með sölu- og sérfræðiþekkingu okkar. Yfir 341 þúsund íbúa á Íslandi eru nettengdir og notkun á samfélagsmiðlum er mikil. Við hlökkum til þess að skapa fleiri tækifæri til að tengja við þá með nýtingu á sérfræðiþekkingu Meta,“ segir hann.

Þóranna K. Jónsdóttir. Ljósmynd/Aðsend

Þóranna leiðir starfsemi Entravision á Íslandi

Þóranna K. Jónsdóttir ráðgjafi mun leiða starfsemi Entravision hérlendis. „Það er okkur mikil ánægja að fá Þórönnu til liðs við okkur til að leiða samstarf okkar við Meta á Íslandi,” segir Saldivar. „Hún hefur yfir 20 ára reynslu af markaðsstarfi og er sérfræðingur á heimsklassa þegar kemur að stafrænu markaðsstarfi. Þekking hennar á markaðnum gerir okkur kleift að tryggja að stuðningur okkar sé sérsniðinn að íslenskum markaði.”

• Blogga um frétt