Ásgerður tekur við af Gylfa í peningastefnunefnd

Ásgerður Pétursdóttir, lektor í hagfræði við Háskólann í Bath á Englandi, hefur verið skipuð í peningastefnunefnd Seðlabanka Íslands af Katrínu Jakobsdóttur forsætisráðherra. Ásgerður tekur sæti Gylfa Zoëga sem hefur setið í nefndinni frá árinu 2009, en hann hefur setið hámarksskipunartíma í nefndinni.

Skipunartími Ásgerðar hefst 21. febrúar og nær til næstu fimm ára.

Ásgerður er með doktorspróf í hagfræði frá University of New South Wales í Sydney, Ástralíu og lauk meistaraprófi í hagfræði frá sama háskóla. Hún hefur unnið á hagfræðisviði Seðlabanka Íslands og stundað rannsóknir við rannsóknardeild Seðlabankans í Svíþjóð.

Rannsóknir og kennsla Ásgerðar eru á sviði peningahagfræði. Hún hefur þróað og unnið með líkön til að greina hagfræðileg úrlausnarefni er varða m.a. fjármálamarkaði, rafræna seðlabankamynt og framkvæmd peningastefnu. Ásgerður hefur haldið fjölda fyrirlestra um rannsóknir sínar við seðlabanka og aðra stofnanir víða um heim.

Gylfi Zoega, pró­fess­or í hag­fræði hefur setið í peningastefnunefnd frá því árið 2009.

Á fundi peningastefnunefndar í síðustu viku greindi Rannveig Sigurðardóttir, varaseðlabankastjóri peningastefnu, frá brotthvarfi Gylfa og upplýsti um að næsti nefndarmaður myndi verða með í næstu ákvörðun, en næsti fundur peningastefnunefndar er í mars.

Peningastefnunefnd tekur ákvarðanir um beitingu stjórntækja Seðlabankans í peningamálum. Stjórntæki bankans í þessu sambandi eru vextir bankans, viðskipti við lánastofnanir og önnur þrautavaralán, ákvarðanir um bindiskyldu og viðskipti á gjaldeyrismarkaði sem hafa það markmið að hafa áhrif á gengi krónunnar.

• Blogga um frétt