Sjö þúsund viðskiptahindranir

Lars Karlsson, stjórnandi í ráðgjafarþjónustu um alþjóðaviðskipti og tollamálefni hjá Maersk-skipafélaginu, sagði í erindi sem hann hélt í Húsi atvinnulífsins á dögunum að sextíu stærstu hagkerfi í heimi hefðu samtals sett á sjö þúsund viðskiptahindranir síðan í fjármálahruninu árið 2008.

Karlsson fór í erindi sínu, sem bar yfirskriftina „Öryggi í alþjóðlegum vöruflutningum á víðsjárverðum tímum“ yfir miklar breytingar sem eru að verða í alþjóðaviðskiptum og flutningum.

Hann sagði veruleikann í dag þann að fólk pantar eitthvað í rólegheitum í snjallsíma sínum en um leið og kaupin eru samþykkt fer af stað mikið ferli í aðfangakeðjum heimsins. „Varan gæti komið frá Englandi eða Úrúgvæ, þú veist það ekki. Og stundum færðu svar um að varan berist þér eftir átta mánuði eða þrjá daga,“ sagði Karlsson.

1-2 fyrirtæki með AEO

Meðal þess sem hann kynnti á fundinum var eins konar vegabréf fyrir inn- og útflytjendur til að liðka fyrir viðskiptum milli landa; AEO-viðurkenninguna, þar sem fyrirtæki geta gerst viðurkenndir rekstraraðilar. „Þetta er tiltölulega nýtt á Íslandi og aðeins 1-2 fyrirtæki eru komin með AEO,“ sagði Karlsson. „Fyrirtæki geta með fyrirbyggjandi aðgerðum verið betur í stakk búin að fást við truflanir og brugðist hraðar við þegar ófyrirséðir atburðir eiga sér stað.“

Lestu ítarlegri umjöllun í ViðskiptaMogganum í dag.