Fyrstu skógarkolefniseiningarnar seldar
Setja bókamerki
Fyrstu skógarkolefniseiningarnar í tengslum við nýlegt verkefni Skógræktarinnar hafa verið seldar hér á landi. Það var fyrirtækið Yggdrasill Carbon sem hafði milligöngu um söluna, að lokinni vottun, fyrir landeiganda í Fljótsdal í byrjun þessa árs. Kaupendur voru Íslandsbanki og Deloitte.
/frimg/1/31/94/1319405.jpg)
„Þetta eru frábær tíðindi og við erum mjög ánægð að Íslandsbanki og Deloitte sýni verkefninu okkar það traust að taka þátt í því frá upphafi. Við væntum þess að fleiri komi með í vegferðina fljótlega,“ segir Björgvin Stefán Pétursson, framkvæmdastjóri Yggdrasils Carbon.
Viðurkennt vottunarferli
Verkefni Skógræktarinnar nefnist Skógarkolefni og snýst um að koma á fót viðurkenndu ferli vottunar á bindingu kolefnis með nýskógrækt.
Ein skógarkolefniseining samsvarar einu tonni af koltvísýringi í andrúmsloftinu sem er bundið í skógi. Til að jafna losun á einu tonni af koltvísýringi þarf því að telja fram eina skógarkolefniseiningu. Til að slíkar einingar geti orðið til þarf að rækta nýjan skóg, fá kolefnisbindinguna vottaða og skráða í Loftslagsskrá Íslands, að því er kemur fram á vefsíðu verkefnisins.
Nota ekki fyrr en skógurinn hefur vaxið
Yggdrasill Carbon er í samskiptum við landeigendur úti um allt land vegna samstarfsverkefnis þeirra og Skógræktarinnar. Svæðið sem um ræðir í Fljótsdal var gróðursett síðasta sumar. Kaupendurnir, Íslandsbanki og Deloitte, nota kolefniseiningarnar sem þeir keyptu í sínu græna bókhaldi en geta ekki notað þær á móti losun gróðurhúsalofttegunda í bókhaldi fyrr en skógurinn er búinn að vaxa meira. Samt sem áður geta kaupendurnir selt kolefniseiningarnar ef þeim sýnist svo, á meðan þeir hafa ekki notað þær.
Spurður segir Björgvin Stefán að fyrirtækin geti byrjað að nota einingarnar í sínu bókhaldi þegar skógurinn er byrjaður að raunbinda kolefni. Fyrstu einingarnar verða gefnar út á fimmta ári en þær ná hámarksbindingu um miðbik samningstímans eða frá 25. til 35. árs.
Hann tekur fram að varan sem Yggdrasill Carbon selur, vottaðar einingar í bið, eru ekki notaðar til að kolefnisjafna út rekstur fyrirtækja á því ári sem þær eru keyptar heldur á þeim árum sem einingarnar verða raunverulega til.
Verkefni til næstu 50 ára
„Núna er verið að tryggja sig inn í framtíðina með því að kaupa einingar í bið. Fyrirtæki eru að horfa mun lengra en næstu 12 mánuði. Þessi verkefni hjá okkur eru til 50 ára,“ segir Björgvin og bætir við mörg fleiri verkefni séu í bígerð í sumar. Í raun hafi fjöldi þeirra tvöfaldast frá síðasta ári.
Spurður segir hann að miklir vaxtarmöguleikar séu í þessum geira og telur að innan fárra ára verði öllum fyrirtækjum gert skylt að kolefnisjafna rekstur sinn.
„Það eru fleiri og fleiri fyrirtæki að átta sig á því að þau verða að fara að taka ábyrgð á eigin losun. Þegar þau finna að í Evrópu er að verða til regluverk um að fyrirtæki verða að skila af sér loftslagsbókhaldi þá fara þau að taka þessi mál alvarlega,“ bætir hann við.
Þórarinn: Tafir á höfuðborgarsvæðinu ekki minni
Sáu eldgosið brjótast út frá Snæfellsnesi
Spara stórfé með olíukaupum ytra
„Erum í miðri hrinu“: Styttist í Eldvörp
Átti ekki að láta pirring bitna á sjúklingi
Gosið gæti varað lengur: Meiri fyrirstaða í gosrásinni
„Má segja að þetta gos hafi þjófstartað“