Hefja vikulega prentútgáfu á áskriftarblaði
Setja bókamerki
Aðstandendur Sameinaða útgáfufélagsins, sem varð til við sameiningu Kjarnans og Stundarinnar í janúar, hafa ákveðið að hefja vikulega prentútgáfu á áskriftarblaði Heimildarinnar frá og með 21. apríl.
Fram kemur í tilkynningu, að efling prentútgáfunnar hafi verið í skoðun síðustu vikur, en endanleg ákvörðun sé tekin sem viðbragð við þeirri skerðingu á innlendri dagblaðaútgáfu sem orðin er við fráhvarf Fréttablaðsins.
„Í gær boðaði Lilja Alfreðsdóttir, menningar- og viðskiptaráðherra, að ríkisstjórnin stefndi á að skuldbinda sig í skattalegar aðgerðir til þess að hvetja til áskrifta að fjölmiðlum. Þar með er líklegt að áskriftarfréttablöð festi sig enn frekar í sessi,“ segir í tilkynningunni.
„Markmið Heimildarinnar er að efla enn ritstjórnina og vinna að greinandi og samfélagslega gagnlegum umfjöllunum. Mat aðstandenda hennar er að með vikulegri útgáfu sé hlutverki Heimildarinnar betur framfylgt.
Sameinaða útgáfufélagið er í dreifðu eignarhaldi, þar sem enginn eigandi fer með meira en 8% hlut, og leggur áherslu á sjálfstæði frá hagsmunablokkum og stjórnmálaöflum. Til þess að tryggja sjálfstæði ritstjórnar til langs tíma starfar Heimildin eftir eigin kröfum um að stunda sjálfbæran rekstur og starfa þannig á forsendum almennings og áskrifenda fremur en tiltekinna fjármögnunaraðila.
Fram að þessu hefur Heimildin komið út tvisvar í mánuði og forveri hennar í prentútgáfu, Stundin, komið út einu sinni til tvisvar í mánuði. Kannanir meðal áskrifenda hafa áður gefið til kynna að stærstur hópur kýs vikulega prentútgáfu. Hægari útgáfutíðni verður áfram yfir sumartímann, með mánaðarlegum, veglegri prentútgáfum, í þeim tilgangi að tryggja sumarleyfi og sjálfbærni útgáfunnar.
Reynslan af breytingunni verður síðan metin heildrænt út frá áhrifum hennar á ritstjórn Heimildarinnar og viðbrögðum lesenda hennar,“ segir enn fremur.
Kristrún komin með umboð
Var ráfandi við Alþingi eins og innbrotsþjófur
„Höfum ákveðið að hefja viðræður“
Fundar með Þorgerði og Ingu eftir hádegi
Halla og Kristrún funda á Bessastöðum í dag
Halla hyggst tilkynna um umboð í dag
Evrópumál voru ekki til umræðu
