Viðskipti | mbl | 17.4.2023 | 9:04

Segir borgarstjóra fara með rangt mál

Dagur B. Eggertsson borgarstjóri. mbl.is/Kristinn Magnússon

Tal borgarstjóra um að borgin hafi orðið fyrir tekjufalli í kórónuveiru-faraldrinum en samt viðhaldið fjárfestingaáætlun er alls kostar ekki rétt.

Þetta segir Þórður Gunnarsson hagfræðingur í nýjasta þætti hlaðvarps Þjóðmála. Þar ræða hann og Örn Arnarson, ritstjórnarfulltrúi á Viðskiptablaðinu, meðal annars um fjárhagsvandræði Reykjavíkurborgar og þá ákvörðun að ráðast ekki í skuldabréfaútboð í síðustu viku eins og áætlað var.

Þórður segir að margir hafi varað við þessari vegferð [í fjármálum borgarinnar] í nokkur ár. Það hlakki þó ekki í þeim hópi því staða borgarinnar nú sé mjög alvarleg. Því næst vísar hann í orð Dags B. Eggertssonar borgarstjóra, sem svaraði því til í síðustu viku að borgin hafi orðið fyrir tekjufalli á liðnum árum, meðal annars í samtali við mbl.is.

„Þetta er sagt í trausti þess að menn kynni sér ekki ársreikninga borgarinnar, því það varð ekkert tekjufall hjá sveitarfélögunum,“ segir Þórður.

Hann bendir á að tekjur Reykjavíkurborgar hafi á árinu 2020 numið 129 milljörðum króna, og aukist um fimm milljarða króna á milli ára. Þá hafi fjárfesting í varanlegum rekstrarfjármunum dregist saman um þriðjung sama ár. Árið 2021 hafi tekjur borgarinnar numið 142 milljörðum króna og aukist um tæpa 14 milljarða króna á milli ára – sem var nokkuð umfram áætlanir. Fjárfestingar hafi þó aftur dregist saman í krónum talið verið langt undir áætlunum.

Frekari bankafjármögnun ekki sjálfgefin

Örn segir í þættinum að allt bendi til þess að borgin sé með neikvætt veltufé frá rekstri.

„Markaðurinn hefur enga trú á þeim áformum sem sett hafa verið fram um að gera eitthvað vitrænt í fjármálum borgarinnar. Það endurspeglast meðal annars í því hvernig krafan á skuldabréfum borgarinnar hefur þróast. Markaðurinn er þannig séð lokaður fyrir borgina,“ segir Örn þegar rætt er um þá ákvörðun Reykjavíkurborgar að ráðast ekki í skuldabréfaútboð.

Hann segir að þetta hafi leitt til þess að borgin hafi þurft að fjármagna sig með ádrátti á lánalínur frá bönkunum. Allt bendi þó til þess að kjörin á slíkum lánalínum sé há en þá sé jafnframt ósennilegt að frekari fjármögnun standi borginni til boða af hálfu bankanna.