Skipuð sendiherra ELTA fyrir Ísland

Evrópusamtökin í lögfræðitækni (ELTA) hafa skipað Margréti Önnu Einarsdóttur, framkvæmdastjóra og stofnanda Justikal, sem „sendiherra“ samtakanna fyrir Ísland.

„Meginmarkmið ELTA er að efla tækni í lögfræðigeiranum í Evrópu. Samtökin taka virkan þátt í samfélagslegri og pólitískri umræðu í því skyni að tala fyrir hagsmunum og áhyggjum félagsmanna sinna og til að styrkja stöðu tækniþróunar á evrópskum mörkuðum,” segir í tilkynningu.

Þar segir einnig að nýsköpunarfyrirtækið Justikal hafi þróað lausn fyrir stafrænt réttarkerfi sem geri aðilum í dómsmálum kleift að meðhöndla gögn á öruggan og rekjanlegan hátt í samræmi við kröfur eIDAS-reglugerðarinnar

„Ég er mjög ánægð og þakklát fyrir traustið sem ELTA sýnir mér með þessari skipan og er virkilega spennt fyrir framhaldinu. Þetta er einnig mikil viðurkenning fyrir Justikal og það starf sem þar hefur verið unnið undanfarin misseri sem miðar allt að því að auðvelda störf lögmanna með því að nýta tæknina til að stafvæða réttarkerfið. Sem stofnandi og framkvæmdastjóri Justikal er ég heilluð af möguleikanum að efla tækni í lögfræðigeiranum og hlakka því mikið til að tengjast fagfólki frá Evrópu og öllum heimshornum á þessu sviði,“ segir Margrét Anna í tilkynningunni.

• Blogga um frétt