Anna Signý nýr framkvæmdastjóri Kolibri

Anna Signý Guðbjörnsdóttir hefur tekið við sem framkvæmdastjóri hugbúnaðarfyrirtækisins Kolibri. Anna Signý er einn af eigendum fyrirtækisins og hefur setið í stjórn þess. Hún tekur við af Skúla Valberg sem einnig er einn af meðeigendum. Skúli mun taka við sem stjórnarformaður Kolibri.

Í fréttatilkynningu segir að Kolibri sé framsækið hugbúnaðar- og hönnunarfyrirtæki sem tekur að sér alls kyns stafræn verkefni eins og t.a.m. hönnun, vefi, öpp og stafrænar lausnir. 

„Anna hefur átt stóran þátt í að skapa Kolibri sérstöðu og við erum í skýjunum að fá jafn öfluga konu og Önnu Signýju til að leiða fyrirtækið,” segir Daði Ingólfsson stofnandi og stjórnarmaður í tilkynningunni.

„Við hjá Kolibri þökkum Skúla Valberg fyrir frábært samstarf í hlutverki framkvæmdastjóra og hlökkum til að vinna með honum áfram í stjórn félagsins,” bætir hann við. 

Spennt fyrir komandi tímum

Anna Signý hefur starfað hjá Kolibri síðan árið 2018 sem sérfræðingur í notendaupplifun. Hún er með cand.it gráðu frá IT háskólanum í Kaupmannahöfn í stafrænni hönnun og upplýsingatækni og hefur m.a. setið í stjórn Samtaka vefiðnaðarins (SVEF). „Ég er spennt fyrir komandi tímum hjá Kolibri og er mjög þakklát fyrir traustið sem Kolibri hefur sýnt mér. Hjarta mitt slær í takt við hjarta Kolibri þar sem nýsköpun og framúrskarandi stafræn hönnun og þróun hrærist. Framundan eru spennandi tímar við að styrkja enn frekar í sessi hönnunarstúdíó Kolibri og mæta auknum áhuga á vöruþróunarteymunum okkar,“ segir Anna í tilkynningunni. 

• Blogga um frétt