Reykjavíkurborg, Akraneskaupstaður og Borgarbyggð, sem eru eigendur Orkuveitu Reykjavíkur (OR) og endanlegir eigendur Ljósleiðarans ehf., hafa samþykkt að auka hlutafé félagsins og bjóða nýjum hluthöfum það til kaups.

Í tilkynningu frá Ljósleiðaranum kemur fram að fyrirtækjaráðgjöf Arion banka hafi verið ráðin sem ráðgjafi til að hafa umsjón með sölu á nýju hlutafé.

Þá kemur fram að markmið hlutafjáraukningar sé að „efla Ljósleiðarann ehf. til lengri tíma litið á heildsölumarkaði fjarskipta og nýta tækifæri sem núverandi uppbygging á nýjum öflugri fjarskiptalandshring Ljósleiðarans mun leiða af sér,“ eins og það er orðað í tilkynningunni.

Morgunblaðið hefur áður fjallað um málefni Ljósleiðarans. Félagið er mikið skuldsett en hefur þrátt fyrir það tekið á sig fjárhagslegar skuldbindingar, meðal annars með kaupum á innviðum Sýnar fyrir um þrjá milljarða króna. Þá greindi Morgunblaðið frá því að Ljósleiðarinn hefði tekið dýr lán á síðasta ári til að fjármagna frekari vöxt og rekstur félagsins.

Hluthafafundur Ljósleiðarans samþykkti í október sl. að ráðast í aukningu hlutafjár, þó með fyrirvara um staðfestingu frá eigendum OR (Reykjavíkurborg, Akraneskaupstað og Borgarbyggð). OR á nú allt hlutafé Ljósleiðarans.

Tengdar fréttir

Ljósleiðarinn og OR

Tap Ljósleiðarans margfaldast á milli ára

• Gagnrýnir lokaða sölu á Ljósleiðaranum
• „Ein stærsta fjárfesting í sögu Reykjavíkurborgar“
• Tap Ljósleiðarans rúmlega þrefaldast
• Erling lætur af störfum hjá Ljósleiðaranum

» Fleiri tengdar fréttir

• Blogga um frétt