Ingvar genginn til liðs við SFF

Ingvar Haraldsson hefur verið ráðinn til Samtaka fjármálafyrirtækja (SFF). Þar mun hann gegna starfi samskiptastjóra en hann hefur þegar hafið störf hjá samtökunum. Þetta kemur fram í tilkynningu frá SFF.

Ingvar hefur verið aðstoðarritstjóri Viðskiptablaðsins frá árinu 2018 og viðskiptablaðamaður á Viðskiptablaðinu, Fréttablaðinu og Vísi frá árinu 2014. Auk þess hefur Ingvar setið í stjórn Blaðamannafélags Íslands undanfarið ár.

Ingvar var í mars síðastliðnum tilnefndur til Blaðamannaverðlauna ársins 2022 í flokki rannsóknarblaðamennsku vegna umfjöllunar um styrktarsjóð og fjármál Sonju de Zorrilla.

Ingvar lauk meistaragráðu í hagsögu frá London School of Economics árið 2017 og er með BA-gráðu í sagnfræði með hagfræði sem aukagrein frá Háskóla Íslands frá árinu 2015. Hann hefur auk þess lokið prófi til verðbréfaréttinda.

Hann starfaði einnig sem stundakennari við Háskólann í Reykjavík frá 2018-2020 þar sem hann kenndi áfanga um sögu hagfræðikenninga.

„Íslensk fjármálafyrirtæki gegna afar mikilvægu hlutverki í samfélaginu og ég hlakka til að takast á við krefjandi og þýðingarmikil verkefni með aðildarfélögum SFF sem og öflugu og reynslumiklu samstarfsfólki hjá samtökunum,“ segir Ingvar í tilkynningunni.

Innan Samtaka fjármálafyrirtækja eru 25 aðildarfélög en sex starfsmenn eru á skrifstofu samtakanna. Stjórnarformaður er Benedikt Gíslason, bankastjóri Arion banka.

• Blogga um frétt