Ásgeir Baldurs hefur verið ráðinn í starf forstjóra ferðaþjónustufyrirtækisins Arctic Adventures. Gréta María Grétarsdóttir, sem gegnt hefur starfinu síðan í desember 2021, hefur sagt upp störfum. Þetta kemur fram í tilkynningu frá félaginu.
Þar kemur jafnframt fram að stjórn félagsins þakki Grétu Maríu fyrir hennar framlag fyrir félagið og óski henni velfarnaðar á nýjum vettvangi. Ásgeir mun hefja störf á næstu dögum.
Ásgeir hefur víðtæka reynslu úr atvinnulífinu, bæði sem stjórnandi, ráðgjafi, fjárfestingastjóri og stjórnarmaður. Hann hefur m.a. verið forstjóri VÍS, fjárfestingastjóri TM, forstöðumaður í fyrirtækjaráðgjöf Kviku og forstöðumaður sérhæfðra fjárfestinga hjá Kviku.
Arctic Adventures skipuleggur, selur og sér um framkvæmd ferða og afþreyingar um allt land. Ársvelta félagsins var um 5,2 milljarðar króna í fyrra. Helstu dótturfélög Arctic Adventures eru Into the Glacier, Lava Tunnel og Your Day Tours.
Stærstu hluthafar Arctic Adventures eru fjárfestingafélagið Stoðir með 35% hlut, Icelandic Tourism Fund, framtakssjóður í rekstri Landsbréfa, með 20% hlut og Freyja, framtakssjóður á vegum Kviku eignastýringar, með 16% hlut.