Hagnaður frá rekstri eykst

Rekstrarhagnaður Landsvirkjunar nam tæplega 16 milljörðum króna á fyrsta fjórðungi ársins, eða ríflega 111 milljónum dala samanborið við 80 milljónir dala á sama tíma á síðasta ári. Aukningin nemur því um 40% í dölum talið. Rekstrartekjur fjórðungsins námu 23,9 milljörðum króna og jukust um 19,3% á milli ára.

Afkoma Landsvirkjunar nam 12,5 milljörðum króna, eða 91,6 milljónum dala. Er þetta lækkun frá sama tímabili fyrra árs, sem helst rekja má til gangvirðisbreytinga innbyggðra afleiðna, það er fjármagnsliðar sem stendur utan grunnreksturs fyrirtækisins.

Skuldir fyrirtækisins lækkuðu um sem nemur 18,6 milljörðum króna frá áramótum og stóðu í 96,7 milljörðum króna í lok mars. Handbært fé frá rekstri nam 19,6 milljörðum króna í fjórðungnum og hækkaði um 42,9% milli ára.

Afla leyfa til að uppfylla orkuþörf

„Afkoma fyrsta ársfjórðungs var með miklum ágætum. Hagnaður fyrir óinnleysta fjármagnsliði, sem endurspeglar afkomu grunnrekstrar Landsvirkjunar, jókst um ríflega 40% frá sama fjórðungi ársins 2022. Rekstrartekjur jukust um tæplega fimmtung frá fyrra ári, sem skýrist af aukinni raforkusölu, háu raforkuverði til stórnotenda og tekjum vegna innleystra áhættuvarna. Á sama tíma lækkaði rekstrarkostnaður fyrirtækisins um 8% frá fyrra ári. Fjármunamyndunin var einnig mjög sterk á fyrsta ársfjórðungi, en handbært fé frá rekstri hækkaði á fjórðungnum um 43% frá fyrra ári og var tæpir 20 milljarðar,“ er haft eftir Herði Arnarsyni, forstjóra Landsvirkjunar í tilkynningu.

Hann segir rekstur aflstöðva hafa gengið vel á ársfjórðungnum og að orkuvinnsla hafi aukist um 5% frá fyrra ári. „Á tímabilinu þurfti þó ítrekað að takmarka afhendingu á skerðanlegri orku til gagnavera og fiskmjölsframleiðenda vegna þess að raforkukerfi Landsvirkjunar er nú rekið nálægt hámarks afkastagetu. Landsvirkjun vinnur nú hörðum höndum að því að afla tilskilinna leyfa til uppbyggingar raforkuvinnslu til að uppfylla þá orkuþörf sem augljóslega er í samfélaginu, bæði almennt og vegna orkuskipta,“ segir Hörður.

• Blogga um frétt