Alltaf hörmulegt að heyra af uppsögnum

Friðbert Traustason, framkvæmdastjóri Samtaka starfsmanna fjármálafyrirtækja, segir alltaf hörmulegt að heyra af uppsögnum og sérstaklega ef þær snúa að þeim sem eldri eru í viðkomandi fyrirtæki.

Fregnir bárust af því í gær að á annan tug starfsmanna Kviku banka hafi verið sagt upp störfum en stöðugildum innan Kviku fækkaði um 4%. Auk þess hefur bankinn ákveðið að ráða ekki í allar þær stöður sem hafa losnað innan samstæðunnar að undanförnu.

Frétt af mbl.is

Á annan tug starfsmanna Kviku sagt upp

„Samtök starfsmanna fjármálafyrirtækja (SSF) er núna að kanna hversu margir félagsmenn SSF var sagt upp og bjóða alla aðstoð stéttarfélagsins. Starfsmenn Kviku eru í fleiri en einu stéttarfélagi og einnig að hluta utan stéttafélaga,“ segir Friðbert í samtali við mbl.is.

„Vinna SSF snýr að því að vernda og aðstoða félagsmenn sína og bjóða aðstoð félagsins, meðal annars lögmann,“ bætir Friðbert við.

Á ekki von á frekari uppsögnum á næstu misserum

Spurður hvort hann eigi von á frekari uppsögnum í geiranum segir Friðbert;

„Það eru því miður alltaf einhverjar uppsagnir í fjármálageiranum. Þær eru sem betur fer fáar síðasta árið þó allt sé erfitt fyrir þá einstaklinga sem lenda í uppsögnum. Starfsmönnum viðskiptabanka og sparisjóða hefur fækkað um 50% frá 2009 til 2023.

Það er líka breyting á störfum því um það bil 800 af 2.400 starfsmönnum viðskiptabankanna eru núna starfsmenn í upplýsingatækni eins og tölvunarfræðingar, verkfræðingar, stærðfræðingar, starfsmenn áhættustýringar og fleiri.

Eftirsóttir starfsmenn á öllum sviðum viðskipta eins og góðir viðskiptafræðingar, hagfræðingar, lögfræðingar og allir þeir sem þjónustu viðskiptavini allan sólarhringinn. Ég á ekki von á frekari uppsögnum í fjármálageiranum á næstu misserum,“ segir Friðbert.

• Blogga um frétt