Stærsti ársfjórðungur í sögu Icelandair

Icelandair flutti 416 þúsund farþega í september, sem er 8% meira en í sama mánuði í fyrra.

Það sem af er ári hefur félagið flutt um 3,4 milljónir farþega, eða 19% fleiri en yfir sama tímabil í fyrra, að því er segir í tilkynningu.

Farþegar til Íslands voru 175 þúsund, frá Íslandi 49 þúsund, 169 þúsund ferðuðust um Ísland og innan Íslands voru farþegar 23 þúsund.

Sætanýting var 82,7% og einingatekjur héldu áfram að styrkjast. Stundvísi var 81%, sem er 10 prósentustiga aukning frá fyrra ári.

Ánægjulegt að sjá heilbrigðan vöxt

„Það er ánægjulegt að sjá heilbrigðan vöxt í farþegafjölda á milli ára og áframhaldandi styrkingu einingatekna nú þegar þriðja ársfjórðungi lýkur en hann var stærsti fjórðungur í sögu Icelandair þegar litið er til fjölda flugferða,” segir Bogi Nils Bogason, forstjóri Icelandair, í tilkynningunni.

„Ég vil þakka starfsfólki okkar fyrir frábært starf yfir sumarmánuðina og þann árangur sem þau hafa náð. Til marks um það hefur félagið nýlega hlotið tvenn verðlaun fyrir framúrskarandi þjónustu. Í september hlutum við nafnbótina fimm stjörnu flugfélag á APEX verðlaununum og í þessari viku unnum við dönsku ferðaþjónustuverðlaunin í flokki flugfélaga. Við erum mjög stolt af þessum viðurkenningum og þakklát okkar traustu viðskiptavinum fyrir að halda áfram að velja Icelandair,” bætir hann við.

• Blogga um frétt