Komust að samkomulagi um möguleg kaup á Heimstaden

Stefnir og Fredensborg AS eigandi Heimstaden ehf. hafa komist að samkomulagi um möguleg kaup sjóðs á vegum Stefnis á öllu hlutafé í Heimstaden á Íslandi.

Kaupin eru þó m.a. háð áreiðanleikakönnun og samþykki endanlegra kaupenda, sem verða eingöngu innlendir lífeyrissjóðir.

Heimstaden á fjölda íbúða hér á landi sem eru í langtímaleigu. Telja þær um 1.600.

Í tilkynningu Heimstaden segir að markmið kaupanna sé að reka sjálfbært leigufélag sem hafi burði til að styðja við nauðsynlega íbúðauppbyggingu á næstu árum og með því styrkja leigumarkaðinn hér á landi. 

Frétt af mbl.is

Kaupa ekki hlut í Heimstaden

„Sérstakur sjóður eða félag í rekstri Stefnis mun fara með eignarhald félagsins og fjármagna starfsemina með eiginfjárframlagi og lánsfjármögnun. Félaginu yrði skipuð sjálfstæð stjórn sem fær það mikilvæga verkefni að byggja enn frekar ofan á þann góða árangur sem hefur náðst og þannig skapa raunhæfan langtímavalkost á íslenskum húsnæðismarkaði.“

Heimstaden átti áður í viðræðum við lífeyrissjóði hér á landi um kaup á félaginu en ekkert varð af þeim kaupum. 

Frétt af mbl.is

Vilja selja hluta af Heimstaden til lífeyrissjóða

• Blogga um frétt