Viðskipti við Play undir milljón

Viðskipti Alþingis við Icelandair eru umtalsvert meiri en við flugfélagið Play. Þannig námu útgjöld Alþingis til flugmiðakaupa af Icelandair á síðasta ári 20,9 milljónum króna samanborið við rúmlega 500 þúsund krónur til miðakaupa af Play.

Þá eru ótaldar tæpar 560 þúsund krónur sem greiddar voru fyrir ferðir í gegnum Vita, ferðaskrifstofu Icelandair. Voru viðskipti Alþingis við Icelandair vegna flugmiðakaupa því ríflega fjörutíufalt meiri en við Play á síðasta ári.

Þetta kemur fram í skriflegu svari skrifstofu Alþingis við fyrirspurn Morgunblaðsins um viðskipti Alþingis við íslensku flugfélögin. 

Frá janúar og fram í september á þessu ári keypti Alþingi flugmiða af Icelandair fyrir tæpar sjö milljónir króna og af Vita fyrir fjórar milljónir króna, samanlagt um 11 milljónir. Flugmiðakaup af Play nema einungis tæpum 300 þúsund krónum.

Í svarinu segir að Alþingi nýti rammasamning Ríkiskaupa við Icelandair og Play við kaup á flugmiðum.

• Blogga um frétt