Frosti hættir sem framkvæmdastjóri Olís

Frosti Ólafsson, framkvæmdastjóri Olís, hefur óskað eftir því að láta af störfum frá og með næstu áramótum. Frosti kemur til með að hefja störf hjá alþjóðlega ráðgjafarfyrirtækinu McKinsey & Company á þeim tíma. Þetta kemur fram í tilkynningu frá Högum, móðurfélagi Olís, til Kauphallarinnar.

Ingunn Svala Leifsdóttir hefur verið ráðin í starf framkvæmdastjóra Olís og tekur við hlutverkinu um næstu áramót.

Ingunn starfaði síðast sem framkvæmdastjóri rekstrar hjá Dohop og þar á undan var hún framkvæmdastjóri rekstrar hjá Háskólanum í Reykjavík. Ingunn situr í stjórnum Kviku banka og Ósa hf.

Ingunn Svala Leifsdóttir hefur verið ráðin í starf framkvæmdastjóra Olís. Ljósmynd/Olís

Frosta eru þakkað fyrir starf sitt í tilkynningunni og Ingunn boðin velkomin. „Það er ánægjuefni að geta tilkynnt um ráðningu Ingunnar Svölu Leifsdóttur í starf framkvæmdastjóra Olís frá næstu áramótum. Ingunn býr að víðtækri reynslu sem stjórnandi og stjórnarmaður í íslensku atvinnulífi sem ég er sannfærður um að muni nýtast vel til að fylgja eftir árangursríku umbótastarfi síðustu missera, í samstarfi við öflugan hóp starfsfólks Olís.  Það eru spennandi tímar framundan hjá Olís þar sem saman fer áframhaldandi aðlögun rekstrar að breyttum neysluvenjum á eldsneytismarkaði og uppbygging þjónustuframboðs á smásölu- og fyrirtækjamarkaði," er haft eftir Finni Oddssyni, forstjóra Haga.

• Blogga um frétt