Fjármálaeftirlitsnefnd Seðlabanka Íslands hefur tekið ákvörðun um að sekta Símann um 76,5 milljónir króna.

Ákvörðunin er tekin á grundvelli þess að stofnunin taldi að Síminn hefði ekki birt ætlaðar innherjaupplýsingar eða tekið ákvörðun um frestun á birtingu á ætluðum innherjaupplýsingum þann 31. ágúst 2021, í tengslum við mögulega sölu á Mílu.

Þetta kemur fram í tilkynningu frá Símanum til Kauphallarinnar. Þar segir að Síminn hafi upplýst markaðinn opinberlega að eigendabreyting á Mílu kæmi til greina auk þess sem upplýst var um að félagið myndi ræða við valda aðila.

„Hefði fjárfestum mátt vera ljóst að það væri mögulegt að Míla yrði síðar seld. Síminn er eðlilega ósammála stofnuninni að á þeim tíma hafi verið til staðar innherjaupplýsingar og telur að fjárfestum hafi verið haldið upplýstum um ferlið með fullnægjandi hætti, m.a. með opinberri tilkynningu til kauphallar þann 31. ágúst 2021,“ segir í tilkynningunni.

Þá kemur fram að Síminn hafi litið svo á að engum innherjaupplýsingum hafi verið til að dreifa þann 31. ágúst 2021, enda hafi engin bindandi tilboð borist í félagið á þeim tíma. Því hafi félagið ekki getað tekið afstöðu til frestunar upplýsinganna.

Einnig kemur fram að Síminn muni ekki sætta sig við niðurstöðuna og sektina og skjóta málinu til dómstóla.

Tengdar fréttir

Ardian kaupir Mílu

Hluthafar Símans munu fá aðra greiðslu

• Sjóðirnir fá minna í sinn hlut
• Vilja greiða 31,5 milljarða króna til hluthafa Símans
• Kostnaður SKE vegna sölunnar á Mílu ekki tekinn saman
• Fjárfesta fyrir 30 milljarða

» Fleiri tengdar fréttir

• Blogga um frétt