Viðskipti stöðvuð eftir 28,5% hækkun í Marel

Kauphöllin stöðvaði viðskipti með bréf í Marel skömmu eftir opnun markaða í morgun. Bréf fyrirtækisins höfðu hækkað um 28,5% í fyrstu viðskiptum eftir tilkynningu félagsins í nótt um að óskuldbindandi viljayfirlýsing um yfirtöku hefði borist.

Frétt af mbl.is

Vilja yfirtaka Marel

Samhliða því gaf Eyrir Invest hf., stærsti einstaki eigandi Marels, út óafturkallanlega yfirlýsingu um samþykki sitt verði tilboð lagt fram í tengslum við viljayfirlýsinguna.

Gengi Marels stendur nú í 450 krónum á hlut og hefur hækkað um 100 krónur frá því í gær þegar það lokaði í 350 krónum á hlut.

Frétt af mbl.is

Árni Oddur hættir sem forstjóri Marel – Deilir við Arion banka

Fyrir tveimur vikum tilkynnti Árni Oddur Þórðarson, forstjóri Marels, að hann hefði látið af störfum hjá félaginu, en hann hafði verið forstjóri í slétt tíu ár. Hefur Árni átt í deilum við Arion banka sem tók til sín 44 milljónir hluti í Eyri Invest, en það nemur um 4,9% hlut í Marel. 

Árni Oddur og faðir hans, Þórður Magnússon, hafa verið stærstu eigendur Eyris með 39% hlut. Fram hefur komið í fréttum að Arion banki hafi einnig leyst til sín 4,4% hlut hans í Eyri. Er bankinn þar með kominn með 9,3% hlut í Eyri, en þeir feðgar eru með um 29,2%.

Í síðasta mánuði greindi Morgunblaðið frá því að erlendir aðilar hefðu á liðnum misserum þreifað fyrir sér um fjárfestingu í Marel með það fyrir augum að eignast meirihluta í félaginu - eða félagið í heild sinni.

Frétt af mbl.is

Hafa áhuga á því að taka yfir Marel

• Blogga um frétt