Gera má ráð fyrir verulegum samdrætti í byggingu nýrra íbúða á næstu misserum. Þetta sýnir niðurstaða könnunar sem Samtök iðnaðarins (SI) hafa látið framkvæma meðal stjórnenda verktakafyrirtækja í íbúðauppbyggingu.

Niðurstaða könnunarinnar verður birt á vef SI í dag, en Morgunblaðið hefur hana undir höndum.

Samkvæmt henni má vera ljóst að háir vextir og skortur á lóðaframboði eru þeir þættir sem hafa mest áhrif á fyrrnefndan samdrátt. Um 88% stjórnenda segja að hækkandi fjármögnunarkostnaður muni hafa neikvæð áhrif á uppbyggingaráform þeirra og leiða til samdráttar.

Þá segir tæplega helmingur þátttakenda í könnuninni að dregið hafi úr fjármögnunarmöguleikum þeirra fyrirtækja til byggingar íbúðarhúsnæðis á síðastliðnum sex mánuðum.

Frétt af mbl.is

Vaxtakostnaðurinn um ein íbúð á mánuði

Mikilvægt að auka lóðaframboð

Sigurður Hannesson framkvæmdastjóri SI segir í samtali við Morgunblaðið mikilvægt að auka lóðaframboð, sérstaklega í Reykjavík.

„Hér blasir að einhverju leyti við hagfræðikenningin um harm heildarinnar. Sveitarfélögin hafa hvert um sig hámarkað sinn hag við uppbyggingu íbúðarhúsnæðis undanfarin ár en það leiðir til þess að sárlega vantar íbúðir til að mæta þörfum landsmanna og svo mun verða áfram næstu ár.“

Frétt af mbl.is

Mikil fjölgun gjaldþrota í byggingariðnaði

Það er óhætt að segja að það sé þungt hljóð í stjórnendum verktakafyrirtækjanna því samkvæmt niðurstöðum könnunarinnar má búast við verulegum samdrætti í byggingu nýrra íbúða á næstu misserum

Þannig reikna þeir með að hefja byggingu um 700 íbúða á næstu tólf mánuðum á meðan tæplega eitt þúsund íbúðir hafa verið í byggingu á síðustu tólf mánuðum, sem er tæplega 30% samdráttur.

Í sambærilegri könnun sem gerð var í mars á síðasta ári bjuggust stjórnendur við um 65% samdrætti, sem raungerðist ef miðað er við talningu Húsnæðis- og mannvirkjastofnunar sem framkvæmd var sl. haust.

Nán­ar er fjallað um málið í Morg­un­blaðinu í dag.

Tengdar fréttir

Vextir á Íslandi

Indó lækkar vexti

• „Ekki svigrúm til frekari launahækkana“
• Óttast að fólk fari aftur að eyða peningum
• Skiptir mestu máli að fjárlögin voru samþykkt
• Gera ekki ráð fyrir að samhljómurinn verði rofinn

» Fleiri tengdar fréttir