Félagið LEV102 ehf., sem heldur utan um rekstur veitingastaðarins Héðinn Kitchen & Bar, var úrskurðað gjaldþrota hjá Héraðsdómi Reykjavíkur þann 10. janúar.
Þetta kemur fram í Lögbirtingablaðinu.
Veitingastaðurinn hefur verið í kröppum rekstri frá stofnun en hann var stofnaður á meðan heimsfaraldur kórónuveirunnar stóð yfir með tilheyrandi samkomutakmörkunum.
Elías Guðmundsson, eigandi LEV102, segir í samtali við mbl.is að viðræður standi yfir um að annar aðili taki við rekstri veitingastaðarins og því sé hann líklega ekki á förum.
Hann segir helstu útskýringar fyrir gjaldþrotinu vera launakostnaður, hækkandi verð á aðföngum og erfitt rekstrarumhverfi til að standa í veitingarekstri.
Þetta er í annað sinn sem félag utan um veitingastaðinn fer í gjaldþrot.