Gera athugasemd vegna rekstrarhæfi Play

Endurskoðandi flugfélagsins Play gerir í ársreikningi félagsins athugasemd við rekstrarhæfi félagsins.

Play birti í gær ársuppgjör fyrir síðasta ár þar sem fram kom að tap félagsins á síðasta ári hefði numið um 4,8 milljörðum króna. Í áritun endurskoðanda segir að í ljósi afkomu síðasta árs sé óvissa fyrir hendi sem geti haft áhrif á rekstrarhæfi félagsins.

Tap félagsins árið 2021 nam um sex milljörðum króna.

Gengið aldrei verið lægra

Play, sem er skráð á First North markaðinn, hefur nú verið athugunarmerkt í Kauphöllinni vegna athugasemda endurskoðandans. Rétt er að taka fram að nokkur munur er á fyrirvara sem þessum og því þegar endurskoðendur efast um rekstrarhæfi félaga, sem á ekki við í þessu tilviki.

Gengi Play hefur lækkað um 16,5% það sem af er degi og stendur nú í 5,6 kr. á hlut. Þó eru lítil viðskipti á bakvið þá lækkun, um 19 milljónir króna. Gengi bréfa í félaginu hefur aldrei verið lægra en nú frá því að félagið var skráð á markað sumarið 2021. Síðan þá hefur gengið lækkað um tæp 73%.

Í uppgjörstilkynningu félagsins í gær kom fram að stefnt væri að 3-4 milljarða króna hlutafjáraukningu á þessu ári.

Í upphaflegri frétt kom fram að fyrirvari hefði verið settur við rekstrarhæfi Play. Hefur orðalaginu verið breytt og þess segir að gerð hafi verið athugasemd við rekstrarhæfi félagsins.

• Blogga um frétt