Hagnaður Tesla hrapar en hlutabréfin hækka

Bílaframleiðandinn Tesla hefur heitið því að flýta fyrir áformum um „hagkvæmari“ gerðir af rafmagnsbílum sínum.

Bílaframleiðandinn tilkynnti um áformin í kjölfar fregna af 9 prósenta lækkun heildartekna á fyrsta ársfjórðungi.

Hækkuðu hlutabréfin um 7,7% í kjölfar tilkynningarinnar og því ekki allt á niðurleið hjá fyrirtæki auðkýfingsins Elon Musk.

Tilkynningin kom mörgum á óvart en sögusagnir hafa verið á kreiki um að Tesla hygðist hætta við áform sín um að setja á markað „Model 2“ bíl – ódýrari bíl sem yrði markaðssettur fyrir breiðari hóp fólks en fyrri Teslur.

Ekki átt sjö dagana sæla

Mikill samdráttur hefur verið í sölu fyrirtækisins en Tesla greindi frá hagnaði upp á 1,1 milljarð dala, sem er 55% samdráttur frá sama ársfjórðungi í fyrra. Voru heildartekjur á fyrsta ársfjórðungi í ár 21,3 milljarðar dala til samanburðar við 23,3 milljarða dala á sama tímabili í fyrra.

Fyrirtækið hefur ekki átt sjö dagana sæla að undanförnu og hefur meðal annars þurft að fækka stöðugildum og afturkalla 4.000 Cybertruck-bíla vegna galla á inngjöf í bifreiðunum. 

Fleiri og fleiri fjárfestar hafa að undanförnu farið fram á ítarlegir greinagerð á stefnu fyrirtækisins í kjölfar verri frammistöðu þess á almennum markaði og vegna áforma Musk um að kynna sjálfakandi leigubíla, svokallaða Robotaxis, á markað á tímum þar sem enn eru miklar efasemdir uppi um sjálfstýrða tækni.

Frétt af mbl.is

Tæplega 4.000 Cybertruck-bifreiðar innkallaðar

• Blogga um frétt