Landsvirkjun tekur fyrstu skref inn á skipulegan raforkumarkað

Landsvirkjun tekur þátt í söluferli fyrir langtímavörur, þ.e. grunnorku og mánaðarblokkir, sem Vonarskarð hefur auglýst í maí og í júní.

Kemur þetta fram í tilkynningu frá Landsvirkjun. 

Fyrra söluferlið fyrir grunnorku var í dag og seldi Landsvirkjun rúmlega 90GWst af raforku fyrir um 700 milljónir kr. Söluferlið fyrir mánaðarblokkir verður á morgun. Eru þetta fyrstu skerf orkufyrirtækis þjóðarinnar inn á skipulegan raforkumarkað.

Í tilkynningunni segir að fyrirtækið hafi verið í sambandi við Elmu, dótturfélag Landsnets, um þátttöku á markaði fyrir skammtímavörur sem áformað er að taki til starfa í upphafi næsta árs.

Landsvirkjun mun greiða fasta þóknun, 1,5 millj., fyrir söluferlið í maí og verður þátttaka í skipulegum raforkumarkaði endurmetin þegar reynsla hefur fengist.

Í tilkynningu Landsvirkjunar er haft eftir Herði Arnarssyni forstjóra fyrirtækisins að stofnun skipulegs raforkumarkaðar hér á landi sé jákvætt skref og að það verði spennandi að fylgjast með þróun hans.

• Blogga um frétt