Heimsmarkaðsverð á gulli, kopar og silfri hækkaði í gær í kjölfar frétta um andlát forseta Írans, Ebrahim Raisi. Gull og kopar hafa aldrei verið dýrari og silfur hefur ekki verið eins dýrt í 11 ár.
Verð á gulli fór hæst upp í 2.450,07 dollara fyrir hverja únsu í gær, sem samsvarar tæpum 12 þúsund krónum fyrir grammið.
Verð á kopar hefur aldrei verið hærra en tonnið fór upp í 11.104 dollara, eða 1.541.790 krónur.
Gull er talin örugg fjárfesting þegar verðbólga er mikil og kopar er málmur sem fjárfestar tengja við alþjóðlegan vöxt, að sögn Kathleen Brooks, rannsóknarstjóra hjá XTB.