Mikið magn eiturefna fannst í rannsókn suðurkóreskra stjórnvalda á vörum frá kínverska netsölurisanum Shein.
AFP fréttastofan hefur eftir talsmanni suðurkóreskra stjórnvalda að efnin hafi meðal annars mælst í barnaskóm, leðurtöskum og beltum, en yfirvöld segjast hafa fundið eiturefni í nær helmingi þeirra vara sem skoðaðar voru frá Shein.
Eiturefnin, sem mældust voru svokölluð þalöt (e. phthalates), en það eru manngerð efni sem finnast víðs vegar og eru gjarnan notuð í vinnslu plastefna, en finnast einnig í snyrtivörum og leikföngum.
Styrkur efnanna mældist í sumum tilvikum 428 sinnum meiri en leyfilegt er, en þekkt er að efnin geti haft áhrif á hormónastarfsemi, dregið úr frjósemi og aukið líkur á hjartasjúkdómum. Þau eru einnig talin sérstaklega skaðleg ungum börnum.
Shein, hefur vaxið fiskur um hrygg á undanförnum árum og er nú orðin ein stærsta netverslun með föt í heiminum. Með auknum vinsældum verslunarinnar hafa viðskiptahættir og öryggisstaðlar fyrirtækisins legið undir ámælum.