Viðskipti | mbl | 9.7.2024 | 15:38

HS Orka lýkur 40 milljarða endurfjármögnun

HS Orka hefur lokið við að endurfjármagna skuldir félagsins. Ljósmynd/Aðsend

HS Orka hefur lokið við að endurfjármagna skuldir félagsins og tryggja lánalínur fyrir áframhaldandi uppbyggingu hér á landi.

Þetta kemur fram í tilkynningu frá HS Orku.

„Fjármögnunin nær til yfirstandandi stækkunar og endurbóta orkuversins í Svartsengi og er mikilvægt skref í átt að metnaðarfullum áformum um frekari vöxt félagsins í jarðvarma og vatnsafli, sem byggja á orkukostum í nýtingarflokki rammaáætlunar. Lánsfjárhæðin nemur að jafnvirði um 290 milljónum dollara eða um fjörutíu milljörðum íslenskra króna og er veitt af íslenskum og alþjóðlegum bönkum og sjóðum,“ segir í tilkynningunni.

Fjölbreyttar áskornir vegna jarðhræringa

Haft er eftir Tómasi Má Sigurðssyni, forstjóra HS Orku, að nýir aðilar séu í hópi lánveitenda.

„Við erum afar sátt við það að hafa lokið svo umfangsmikilli endurfjármögnun á sama tíma og við höfum þurft að mæta fjölbreyttum áskorunum í rekstri vegna jarðhræringa og eldsumbrota á Reykjanesskaganum síðustu misseri. Þetta undirstrikar styrk félagsins og trú jafnt innlendra sem erlendra lánveitenda á vaxtaráform okkar til framtíðar.
Það er jafnframt ánægjulegt að í hópi lánveitenda eru nýir aðilar en félagið gaf út skuldabréf á US Private Placement-markaðnum. Við erum eitt fyrsta einkarekna félagið hér á landi til að gefa út á þeim markaði og erum við stolt af því,“ er haft eftir Tómasi.

Tómas Már Sigurðsson er forstjóri HS Orku. Ljósmynd/Aðsend

Grænn fjármögnunarrammi

Þá er haft eftir Tómasi að endurfjármögnunin falli undir grænan fjármögnunarramma félagsins.

„Endurfjármögnunin fellur undir grænan fjármögnunarramma félagsins og styður þannig við langtímamarkmið okkar í rekstri. Við höldum áfram stækkun og endurbótum orkuversins í Svartsengi og stefnum að því að ljúka framkvæmdinni í árslok 2025 en hún mun, ásamt öðrum verkefnum sem eru framundan hjá okkur, leggja lóð á vogarskálar orkuskipta á Íslandi og mæta vaxandi eftirspurn eftir raforku hér á landi.“

Ráðgjafar HS Orku við endurfjármögnunina voru RBC Capital Markets en lögfræðiráðgjöf veittu Latham & Watkins ásamt Juris. Lánveitendur nutu ráðgjafar frá White & Case.