Nýtt tilboð í þrotabú Skagans 3X

Verið er að skoða nýtt tilboð sem borist hefur í þrotabú Skagans 3X, en tilboðið tekur til allra eigna búsins auk fasteigna þar sem starfsemin hefur verið hýst en eru ekki í eigu þrotabúsins.

Áður hafði komið fram tilboð í hluta rekstursins.

Í samtali við Morgunblaðið segir Helgi Jóhannesson skiptastjóri þrotabúsins að hinn nýi tilboðsgjafi hafi ekki komið fram með beinum hætti, heldur hafi tilboðið borist með milligöngu lögmannsstofu.

Frétt af mbl.is

Íslenskir fjárfestar bjóða í eignir Skagans 3X

Afstaða liggi fyrir fljótlega

Segir Helgi tilboðið vera til skoðunar hjá þeim sem eiga hlut að máli, þ.e. þrotabúinu sjálfu, Íslandsbanka sem á veð í eignum þrotabúsins sem og eiganda umræddra fasteigna sem tilboðið tekur til, en þær eru í eigu félagsins Grenja sem er til heimilis á Akranesi.

Samkvæmt upplýsingum úr fyrirtækjaskrá er hlutverk félagsins Grenja „fasteignarekstur gegn þóknun eða samkvæmt samningi“, en eigandi félagsins er skráður Arnfinnur Teitur Ottesen.

Fyrir liggur tilboð fyrirtækisins KAPP í hluta þrotabús Skagans 3X eins og áður hefur komið fram, en ekki hefur verið tekin afstaða til þess enn.

Búist er við að afstaða hlutaðeigenda til fyrirliggjandi tilboða liggi fyrir áður en langt um líður.

Frétt af mbl.is

KAPP með tilboð í hluta Skagans 3X