Hagnaður Landsbankans á fyrri helmingi ársins nam 16,1 milljarði króna. Á síðasta ári nam hagnaðurinn 14,5 milljörðum.
Þetta kemur fram í tilkynningu frá Landsbankanum.
Hagnaðurinn á öðrum ársfjórðungi nam 9 milljörðum og batnar á milli ára en hagnaðurinn á sama tíma á síðasta ári nam 6,7 milljörðum króna.
Arðsemi eiginfjár var 10,5% en til samanburðar nam arðsemin 10,3% á síðasta ári. Hreinar vaxtatekjur námu 29,1 milljarði króna og hreinar þjónustutekjur voru 5,4 milljarðar króna.
Í tilkynningunni segir að virðisbreytingar útlána hafi verið neikvæðar um 3,5 milljarða króna. Stór hluti virðisbreytinga séu vegna óvissu um fjárhagslegar afleiðingar náttúruhamfaranna á Reykjanesskaga.
„Uppgjör Landsbankans fyrir fyrstu sex mánuði ársins er sterkt og öll fjárhagsleg markmið sem bankinn hafði sett sér náðust. Arðsemi er í samræmi við markmið og kostnaðarhlutfallið er með því lægsta sem gerist. Vaxtatekjur eru sterkar en vel hefur tekist til við ávöxtun á lausafé bankans,” er haft eftir Lilja Björk Einarsdóttur bankastjóra Landsbankans í tilkynningunni.
Haft er eftir Lilju að stærsti viðburður síðasta ársfjórðungs hafi verið undirritun samnings um kaup bankans á tryggingafélaginu TM.