Samkeppniseftirlit Spánar hefur sektað gistibókunarfyrirtækið Booking.com um 413 milljónir evra, sem nemur um 62 milljörðum króna, fyrir að misnota markaðsráðandi stöðu sína á síðustu fimm árum.
„Þessir viðskiptahættir hafa haft áhrif á hótel á Spáni og aðrar ferðaskrifstofur á netinu sem keppa við fyrirtækið. Skilmálar og skilyrði [Booking.com] skapa óréttlátt ójafnvægi í viðskiptasamningum við hótel á Spáni,“ segir í yfirlýsingu samkeppniseftirlitsins CNMC.
Þar segir einnig að Booking.com hafi komið í veg fyrir að önnur bókunarfyrirtæki á netinu gætu komist inn á markaðinn og stækkað, með því að hafa fleiri bókunarmöguleika og á betri staðsetningum heldur en samkeppnin.
Þetta er hæsta sekt sem eftirlitið hefur nokkurn tímann veitt en Spánn er næstvinsælasti gististaður Booking.com, á eftir Frakklandi.
Að sögn eftirlitsins var fyrirtækið með 70 til 90 prósenta markaðshlutdeild á Spáni á tímabilinu sem rannsakað var.
Booking.com segist vera „mjög ósammála“ niðurstöðum samkeppniseftirlitsins. Fyrirtækið ætli sér að áfrýja „fordæmalausri ákvörðun“ stjórnvalda.