Skattar hækki í Bretlandi á næstunni

Rachel Reeves, fjármálaráðherra Bretlands, segir að ríkisstjórnin verði að hækka skatta í næstu fjárlögum sem verða kynnt í október.

Reeves segir þetta í hlaðvarpsþætti en BBC greinir frá.

Á mánudag fullyrti Reeves að 22 milljarða punda halli væri á ríkisfjármálunum vegna fyrri ríkisstjórnarinnar sem var undir stjórn Íhaldsflokksins.

Virðisaukaskattur á einkaskóla

Í þingkosningabaráttunni var orðræða Verkamannaflokksins á þá leið að skattar yrðu ekki hækkaðir á „vinnandi fólk“. Afstaða flokksins til skattakerfisins var talin nokkuð óljós í kosningabaráttunni.

Reeves ítrekar að hún ætli ekki að hækka tekjuskatt eða virðisaukaskatt. Hún útiloki þó ekki að hækka erfðafjárskatt, fjármagnstekjuskatt eða að skattlagningu lífeyrisgreiðslna.

Verkamannaflokkurinn hefur afnumið undanþágu frá virðisaukaskatti sem einkaskólar hafa notið. Frá og með næstu áramótum mun 20% virðisaukaskattur leggjast á skólagjöld einkaskóla til að fjármagna 6.500 kennarastöður í Bretlandi.

BBC

• Blogga um frétt