Tómas Brynjólfsson verður skipaður varaseðlabankastjóri fjármálastöðugleika til fimm ára frá og með 1. ágúst.
Þetta kemur fram á vefsíðu Stjórnarráðsins.
mbl.is hafði áður greint frá því að fjármála- og efnahagsráðherra hefði tilnefnt Tómas til forsætisráðherra, en það er forsætisráðherra sem skipar í embættið eftir tilnefningu fjármála- og efnahagsráðherra.
Í tilkynningunni segir að Tómas hafi lokið meistaragráðu í alþjóðastjórnmálum frá London School of Economics árið 2004 og meistaragráðu í hagfræði frá Háskóla Íslands árið 2003. Þá lauk hann BA-gráðu í alþjóðastjórnmálafræði, sögu og hagfræði við University of Georgia árið 2002.
Tómas hefur gegnt embætti skrifstofustjóra á skrifstofu efnahagsmála í fjármála- og efnahagsráðuneytinu frá árinu 2018 og var settur ráðuneytisstjóri frá janúar til apríl 2024. Á árunum 2015-2018 var hann framkvæmdastjóri á skrifstofu þjónustuviðskipta hjá EFTA-skrifstofunni í Brussel.
Þá var hann skrifstofustjóri á skrifstofu efnahagsmála og fjármálamarkaða í fjármála- og efnahagsráðuneytinu á árunum 2013-2015 en starfaði áður sem sérfræðingur í efnahagsmálum í forsætisráðuneyti og fjármála- og efnahagsráðuneyti. Á árunum 2006-2008 starfaði hann í greiningardeild Landsbankans.