Hagfræðideild Íslandsbanka spáir því að peningastefnunefnd Seðlabanka íslands haldi stýrivöxtum óbreyttum.
Þetta kemur fram á vef Íslandsbanka.
Stýrivextir standa í 9,25% eins og stendur og mun nefndin koma saman 21. ágúst til að taka ákvörðun.
Fram kemur að þrálát verðbólga, háar verðbólguvæntingar, viðvarandi þróttur í íbúðamarkaði og allsterkur vinnumarkaður muni trúlega vega þyngra en vísbendingar um kólnandi hagkerfi og minni eftirspurnarspennu á komandi fjórðungum.
„Við teljum hins vegar að peningastefnunefndin ætti að skoða það gaumgæfilega hvort ekki sé rétt að hefja hægfara vaxtalækkunarferli á seinni árshelmingi, fremur en bíða eftir afgerandi merkjum um að hagkerfið hafi kólnað og verðbólguþrýstingur minnkað verulega,“ segir á vefnum.
Almennt sé talið heppilegra að peningastefna sé framsýn og breytingar á henni séu framkvæmdar jafnt og þétt, fremur en að stefnan byggi fyrst og fremst á baksýnisspeglinum og breytingar á henni séu snarpar, að því er segir á vefnum.
„Undantekning frá þessu er vitaskuld þegar ófyrirséðir skellir á borð við heimsfaraldur gerbreyta efnahagshorfum á stuttum tíma en ekkert slíkt virðist eðli máls samkvæmt vera á radarnum þessa dagana.“