atNorth kynnir stærsta gagnaverið til þessa

Gagnavers- og ofurtölvufyrirtækið atNorth hefur kynnt sitt stærsta gagnaver til þessa í bænum Ølgod í Varde á Vestur-Jótlandi í Danmörku. Gagnaverið, sem byggt er frá grunni á 174 hektara lóð, fær nafnið DEN02, að því er segir í tilkynningu.  

DEN02 er fjórða gagnaverið sem atNorth hefur í byggingu á Norðurlöndum, en fyrir er atNorth með í rekstri þrjú gagnaver á Íslandi, tvö í Svíþjóð og tvö í Finnlandi.

Frétt af mbl.is

atNorth stækkar við sig

„Óhætt er að segja að DEN02 sé fyrirmynd gagnavera framtíðar. Það er lifandi dæmi um nýsköpun í geiranum, með áherslu á orkunýtingu í hönnun og notkun nýjustu tækni á sviði endurnýtingar varma, góðu staðarvali í Danmörku og áherslu atNorth á sjálfbærni. Gagnaverið er kjörið fyrir hyperscale fyrirtæki og fyrirtæki á sviði gervigreindar sem vilja draga úr kolefnispori þungrar tölvuvinnslu sinnar,” segir Eyjólfur Magnús Kristinsson, forstjóri atNorth, í tilkynningunni.

Taka á DEN02-gagnaverið í notkun síðla árs 2026. Í fyrsta áfanga verður það með afkastagetu upp á 250 megavött, en frekari stækkun er möguleg í mörg hundruð megavatta afkastagetu.

DEN02 er annað gagnaver atNorth sem rís í Danmörku, en hið fyrra, DEN01, er í grennd við Ballerup og er stefnt að opnun þess fyrir annan ársfjórðung 2025.

• Blogga um frétt