Einkaneysla og útflutningur sækja í sig veðrið

Íslandsbanki spáir því að hagvöxturinn í ár verði 0,3% en útlit sé fyrir 1,2% hagvöxt á næsta ári. 

Þetta kemur fram í nýrri þjóðhagsspá bankans. 

Þar segir jafnframt, að eftir mikinn hagvaxtarkipp árin 2021-2022 hafi dregið umtalsvert úr vextinum eftir því sem leið á síðasta ár.

„Loðnubrestur setti sterkan svip á þróunina en mótbyr í öðrum útflutningi hafði einnig áhrif ásamt því að einkaneysla skrapp saman. Hljóðar spá okkar nú upp á 0,3% hagvöxt í ár en árið markar í raun hagsveifluskil þótt líklega verði ekki samdráttur á ársgrundvelli,“ segir í spá bankans. 

Þrálát verðbólga og seigla í hagkerfinu hafa tafið fyrir vaxtalækkun en hægfara vaxtalækkunarferli gæti þó hafist á lokafjórðungi þessa árs, að því er fram kemur í spánni. mbl.is/Kristinn Magnússon

1,2% hagvöxtur á næsta ári og útlit fyrir 2,5% hagvöxt 2026

„Útlit er fyrir 1,2% hagvöxt árið 2025 þar sem einkaneysla og útflutningur sækja í sig veðrið en á móti er útlit fyrir nánast óbreytta fjárfestingu milli ára. Árið 2026 er útlit fyrir 2,5% hagvöxt en hraðari vaxtartaktur skýrist ekki síst af auknum fjárfestingarhug fyrirtækja með lækkandi vaxtastigi og hraðari kaupmáttarvexti heimila eftir því sem verðbólga hjaðnar,“ segir enn fremur. 

Þá kemur fram, að eftir bakslag í vexti ferðaþjónustu og lítilsháttar samdrátt í útflutningi á fiski og áli í ár sé útlit fyrir tímabundinn viðskiptahalla. Á næstu tveimur árum sé hins vegar von á hóflegum vexti í útflutningi bæði vöru og þjónustu. Vöxturinn byggi meðal annars á auknum útflutningi eldisfisks, vexti í botnfiskafla, minni áhrifum af skerðingu orku á álútflutning og auknum útflutningi á lyfjum og hátæknivörum.

Spá hærra gengi krónu

„Við spáum því að viðskiptahalli verði 1,1% af VLF í ár en jafnvægi komist á utanríkisviðskipti árin 2025 og 2026. Batnandi viðskiptajöfnuður og innflæði í fjárfestingar koma til með að styðja við gengi krónu á spátímanum og horfur eru á 2% hærra gengi krónu í lok spátímans en það var í lok ágúst 2024,“ segir í spá bankans. 

Vegurinn í átt að verðbólgumarkmiði hefur verið holóttur en verðbólga hefur þó hjaðnað þokkalega það sem af er þessu ári og útlit er fyrir hraustlegri hjöðnun er líður á spátímann, að því er bankinn segir. Ljósmynd/Colourbox

Útlit fyrir hraustlegri hjöðnun verðbólgunnar

Bent er á, að vegurinn í átt að verðbólgumarkmiði hafi verið holóttur en verðbólga hafi þó hjaðnað þokkalega það sem af sé þessu ári og útlit sé fyrir hraustlegri hjöðnun er líði á spátímann. Stöðugra verðlag erlendis, minni eftirspurnarþrýstingur og hófsamir kjarasamningar stuðli ekki síst að þeirri hjöðnun. Verðbólga muni mælast 6% að jafnaði á þessu ári en hjaðna niður í 3% á spátímanum. Útlit sé fyrir að verðbólga komist inn fyrir efri vikmörk verðbólgumarkmiðs Seðlabankans á fyrri hluta næsta árs.

„Þrálát verðbólga og seigla í hagkerfinu hafa tafið fyrir vaxtalækkun en hægfara vaxtalækkunarferli gæti þó hafist á lokafjórðungi þessa árs. Vaxtalækkunarferlinu mun trúlega ljúka með stýrivexti nærri 5,5%, sem við teljum líklega nærri jafnvægisvöxtum um þessar mundir,“ segir í spánni. 

• Blogga um frétt