Sækja 265 milljónir og setja þunga á erlenda markaði

Netöryggisfyrirtækið Keystrike lauk nýlega nýrri fjármögnunarlotu og sótti sér um tvær milljónir dala, eða sem nemur um 265 milljónum króna. Í viðskiptunum er félagið metið á um 15 milljónir dala, eða 2,1 milljarð. Bæði núverandi fjárfestar auk nýrra einkafjárfesta á Íslandi og í Bretlandi leiddu fjármögnunina.

mbl.is fjallaði ítarlega um lausn Keystrike í fyrra, en um er að ræða nýja og sérstæða nálgun á tölvuöryggi. Nokkrir reynsluboltar í netöryggismálum komu að stofnun Keystrike. Þar ber  að nefna dr. Ýmir Vigfússon, einn af stofn­end­um tölvu­ör­ygg­is­fyr­ir­tæk­is­ins Synd­is og Advers­ary og und­an­farið dós­ent við Emory há­skól­ann í Georgíu í Banda­ríkj­un­um.

Auk hans eru stofnendurnir þeir Valdimar Óskarsson, forstjóri Keystrike og fyrrverandi forstjóri Syndis, Árni S. Pétursson, fyrrverandi yfirmaður viðskiptaþróunar og markaðsmála hjá Betware, Steindór Guðmundsson, fyrrverandi framkvæmdastjóri Adversary og þróunarstjóri hjá Betware og Árni Þór Árnason, fyrrverandi rekstrarstjóri AwareGO.

Frétt af mbl.is

Enn í tilraunafasa en metnir á 1,4 milljarða

Verðmat fyrirtækisins aukist um 50% á einu ári

Fyrir ári síðan var fyrirtækið að ljúka þriðju fjármögnunarlotu sinni. Í þeirri fjármögnun var verðmat fyrirtækisins komið upp í 10 milljónir dala, eða um 1,4 milljarða íslenskra króna, en þá hafði netöryggislausn Keystrike ekki enn verið gefin út.

Með fjármögnuninni núna er því verið að miða við 50% hærra verðmat, eða 2,1 milljarð króna. Valdimar segir í samtali við mbl.is að rúmlega helmingur þeirrar fjármögnunar komi frá nýjum fjárfestum, en eldri fjárfestar og stofnendur setji einnig fjármuni í félagið.

Komið í notkun hjá innviða- og framleiðslufyrirtækjum

Samtals eru hluthafar í dag 34, en þar af eiga stofnendurnir í dag rúmlega 63% í fyrirtækinu.  

Lausn Keystrike er þegar komin í notkun hjá þó nokkrum viðskiptavinum. Valdimar nefnir að þar á meðal séu framleiðslu og innviðafyrirtæki á Íslandi og þá séu önnur fyrirtæki annað hvort að skoða ítarlega að innleiða lausnina eða komin af stað í þeirri vegferð. Þar á meðal eru bankar bæði hér á landi og heilbrigðisfyrirtæki og hótelkeðjur erlendis.

Valdimar segir að núverandi lausn Keystrike sé ekki skýjalausn og að aðallega sé horft til þess að verja nokkra starfsmenn sem hafi aðgang að mikilvægum upplýsingum eða stýribúnaði. Hins vegar sé komin upp tilraunaútgáfa af skýjalausn fyrirtækisins og gert ráð fyrir að hún komi að fullu út um mitt næsta ár. Þá segir hann að hægt verði að fara í alhliða vörn fyrir alla starfsmenn fyrirtækja og að auðveldara verði að skala upp lausnina.

Lausn Keystrike gengur út á að votta að þær skipanir sem sendar eru yfir netið séu í raun slegnar inn á lyklaborð á tölvu sem þegar hefur verið samþykkt. mbl.is/Árni Sæberg

En hvað gengur þessi lausn út á?

Til að gera langa sögu stutta geng­ur hug­mynd­in og í dag lausn fyr­ir­tæk­is­ins út á að votta að innslátt­ur hafi átt sér stað frá vinnu­stöð not­enda. Það þýðir í raun að hug­búnaður­inn vott­ar að það hafi verið mann­eskja á bak við lykla­borðið sem fram­kvæm­ir þær skip­an­ir sem eru send­ar áfram t.d. inn á tölvu­kerfi fyr­ir­tækja eða stofn­ana, eða í gegn­um fjar­vinnslu­kerfi. Valdi­mar tek­ur fram að þetta staðfesti ekki hvaða mann­eskja hafi verið að slá inn skip­an­irn­ar, en að þær komi frá ákveðinni vél.

En hvaða máli skipt­ir þetta um­fram þær ör­ygg­is­lausn­ir sem eru í boði í dag? Valdi­mar seg­ir að með þessu sé í raun verið að koma í veg fyr­ir nokkr­ar ef ekki flest­ar af helstu inn­brota­leiðum sem tölvuþrjót­ar noti í dag eða nái alla­vega að draga veru­lega úr áhrif­um þeirra, meðal ann­ars þegar kem­ur að svo­kölluðum ein­beitt­um tölvu­árás­um (e. spe­ar phis­hing).

Fullur þungi í markaðssókn erlendis

Fyrirtækið er nú með 17 starfsmenn og hefur fjölgað úr 11 starfsmönnum í fyrra. Þar á meðal hafa þeir ráðið sérhæfðan sölu- og markaðsmann í netöryggismálum í San Francisco í Bandaríkjunum. Auk hans eru starfsmenn í Noregi, Frakklandi og Dubai, en stærsti hluti starfsmannanna er hér á landi.

Nota á fjármögnunina núna til að hefja erlenda markaðssókn af fullum þunga. Valdimar útilokar ekki að farið verði í frekari fjármögnun á komandi mánuðum til að styðja enn frekar við þá sókn og vöxt fyrirtækisins.

• Blogga um frétt