Viðskipti | mbl | 10.10.2024 | 10:44

Spá því að verðbólgan hjaðni í október

Verðbólgan er á niðurleið miðað við spá bankans. mbl.is/Karítas

Hagfræðideild Landsbankans spáir því að vísitala neysluverðs hækki um 0,27% á milli mánaða nú í október og að ársverðbólga hjaðni úr 5,4% í 5,1%.

Í tilkynningu frá bankanum segir að húsnæðisliður vísitölunnar muni hafa mest áhrif til hækkunar á milli mánaða, en þar sem gert er ráð fyrir að húsnæðisliðurinn hækki töluvert minna en fyrir ári muni það hafa áhrif til hjöðnunar ársverðbólgu.

Matarkarfan talin munu hækka lítillega

Bent er á að matarkarfan hafi lækkað um 0,5% á milli mánaða í ágúst, í fyrsta sinn í þrjú ár, og lækkað svo aftur um 0,2% í september.

„Hér má ætla að áhrif aukinnar samkeppni á matvörumarkaði hafi haft áhrif,“ segir í tilkynningu bankans.

„Verðathugun okkar fyrir októbermánuð bendir samt til þess að matarkarfan muni hækka lítillega nú, langmest vegna verðhækkana á kjöti. Við spáum því að matarkarfan hækki um 0,2% á milli mánaða.“

Þá er því spáð að reiknuð húsaleiga, sem endurspeglar kostnaðinn af því að eiga húsnæði, hækki um 0,7% á milli mánaða (0,14% áhrif) í október.

„Frá því í júní, þegar Hagstofan tók upp nýja aðferð við mat á reiknaðri húsaleigu, hafa mælingar verið stöðugri og mánaðarbreytingar verið á þrengra bili. Í október í fyrra hækkaði reiknuð húsaleiga um rúmlega 2%. Nú spáum við töluvert minni hækkun og að þar með dragi úr framlagi reiknaðrar húsaleigu til ársverðbólgu.“

Flugfargjöld hækka og bensínverð lækkar

„Verð á flugfargjöldum til útlanda sveiflast verulega í samanburði við marga aðra liði vísitölunnar,“ segir í tilkynningunni.

„Í októbermánuði eru þó yfirleitt ekki afgerandi mánaðarsveiflur og við spáum nú 1,9% hækkun á flugfargjöldum á milli mánaða. Gangi spáin eftir verður nokkurn veginn jafn dýrt að fljúga til útlanda í október í ár og í fyrra. Þá spáum við því að verð á bensíni og dísilolíu lækki um tæplega 0,1% á milli mánaða.“